АҚШда миллионер Роберт Дёрст 21 йил аввалги қотилликда айбдор деб топилди. У жиноятлари тўғрисида ўзи ҳақидаги сериални суратга олиш чоғида билмасдан айтиб қўйган

АҚШнинг Лос-Анжелес шаҳрида маслаҳатчилар иштирокидаги суд мажлиси миллионер Роберт Дёрстни унинг дўсти Сьюзан Берманга нисбатан 2000 йилда амалга оширилган қотилликда айбдор деб топди.

Маслаҳатчилар Дёрстга нисбатан биринчи даражали қотиллик айблови исботланган деб топди. Уларнинг хулосасига кўра, Дёрст 1982 йилда унинг ўз рафиқаси ғойиб бўлишига алоқадорлиги ҳақида айтиб беришидан қўрқиб, Берманни ўлдирган. Дёрст ўз хотинининг ўлимида гумон қилинган, бироқ далиллар йўқлиги сабабли унга айблов эълон қилинмаган. Берман миллионернинг яқин дўсти бўлган, ўлдириб кетилишидан аввал полиция уни яна бир марта сўроқ қилмоқчи бўлган.

78 ёшли Дёрстнинг ўзи суд мажлисида қатнашмади — у коронавирус билан касалланган одам билан мулоқот қилгач, қамоқхонада изоляцияга олинган.

Дёрстга нисбатан ҳукм 18 октябрда чиқарилади. У муддатидан олдин озод қилиш ҳуқуқисиз умрбод қамоқ жазосига маҳкум қилиниши мумкин.

Берманнинг ўлдириб кетилиши ҳақидаги жиноят иши Дёрстнинг ҳаётига бағишланган «Лаънат» (The Jinx) ҳужжатли сериал суратга олинганидан кейин очилди. Журналист билан бўлган суҳбатдан кейин миллионер ҳожатхонага кириб, ўз-ўзи билан гаплаша бошлаган — бу вақтда унинг микрофони ўчирилмаган эди. «Жин урсин, ўзи мен нима қилдим? Уларнинг ҳаммасини ўлдирдим, албатта», — деган у шу жумладан. Суратга олиш гуруҳи ушбу аудиоёзувни ҳамда сериал устида ишлаш чоғида тўпланган бошқа далилларни полицияга олиб борган.

2001 йилда Дёрст ўзи билан қўшни бўлиб яшаган одамни ўлдирган. Ушбу қотиллик учун у судланган, аммо суд маслаҳатчилари уни ўзини ўзи мудофаа қилиш зарурати доирасида ҳаракат қилган, деб топган.