АҚШда оиласи билан бирга яшайдиган ўзбекистонлик 15 ёшли Ғиёс Умаров, iTunes U дастуридаги камчиликни аниқлашга муваффақ бўлди. Ғиёснинг исми дастурнинг янгиланган версиясига компаниянинг миннатдорчилиги тариқасида киритиб қўйилди. Бу ҳақда Ғиёс Умаровнинг онаси Facebook’да сўзлаб берди.
Бепул ўқув материалларининг энг катта каталогларидан бири ҳисобланган iTunes U дунё бўйлаб миллионлаб ўқитувчилар ва ўқувчилар орасида машҳур саналади. Шунга қарамай, яқин вақтгача дастурда камчилик кузатилган. Биров бошқа бир фойдаланувчининг барча шахсий маълумотларига эга бўлиши ёки таълим жараёнига халал бериш мумкин бўлган.
Бундан бир йилча аввал Ғиёс Apple компаниясига мазкур хатони қандай қилиб тузатиш мумкинлигини дастурлаш тилидаги кодлар билан ёзиб юборган. Apple ёш истеъдод эгасига миннатдорлик билдириш мақсадида Ғиёс Умаровнинг исмини янгиланган дастурга қўшиб қўйган.
Онасининг айтишича, шундан кейин ўғли штат губернаторнинг шахсан ўзидан табрик қабул қилиб олган. Бу Ғиёснинг илк муваффақияти эмас. Американинг «NJ.com» нашрининг маълум қилишича, 2020 йилда у QR-код ёрдамида исталган одам смартфондан фойдаланиши билан боғлиқ хатони аниқлаган.
Ғиёс Умаров айни вақтда Нью-Жерсидаги Холмдел ўрта мактаби технолог-талабалар ассоциацияси аъзоси ҳисобланади.
Изоҳ (0)