Тошкентда 17 сентябрь куни «Ҳизб ут-Таҳрир»га аъзо яна 12 киши қўлга олинди. Бу ҳақда пойтахт ИИББ матбуот хизмати хабар берди.

Қайд этилишича, ҳуқуқни муҳофаза қилувчи идоралар томонидан Олмазор, Учтепа, Яшнобод ва Юнусобод туманларида истиқомат қилувчи ушбу фуқароларнинг жиноий фаолиятига чек қўйишга қаратилган тезкор тадбирлар ўтказилиб, гумонланувчилар ушланди ва қамоққа олинди.

Ушланган «таҳрирчилар»нинг барчаси Юнусобод туманида истиқомат қилувчи 1980 йилда туғилган Р.У.нинг ғоявий таъсири остида экстремистик фаолият билан шуғулланиб келган.

Р.У. ва унинг жиноий алоқалари интернет орқали Украинада яшириниб келаётган 1980 йилда Қирғизистонда туғилган, Маҳмуд Абдулмўмин тахаллусли Маҳмуджон Холдаров билан алоқа ўрнатиб, унинг маърузалари ва «Ҳизб-ут Таҳрир» экстремистик ташкилоти материалларини аҳоли орасида тарқатиш ҳамда унинг кўрсатмалари асосида «таҳрирчилар» сафига янги аъзоларни ёллаш билан шуғулланиб келган.

Шунингдек, улар Ўзбекистонда халифалик давлатини қуриш тўғрисидаги ғояларни доимий равишда тарғиб қилган.

Мазкур шахсларнинг яшаш манзилларида ва уяли алоқа воситаларида «Ҳизб-ут Таҳрир» диний экстремистик ташкилотининг адабиётлари ва материаллари мавжудлиги аниқланиб, процессуал тартибда расмийлаштириб олинган.

Қайд этилишича, ҳозирда уларнинг ноқонуний хатти-ҳаракатларига ҳуқуқий баҳо бериш ва жавобгарликка тортиш мақсадида тергов-суриштирув тадбирлари давом эттирилмоқда.

Эслатиб ўтамиз, 10 сентябрь куни Тошкентда ва Тошкент вилоятида «Ҳизб ут-Таҳрир»га аъзо 29 нафар аёл қўлга олингани ҳақида хабар берилган эди. 15 сентябрь куни ушбу диний экстремистик ташкилоти аъзоларининг яна 10 нафари қўлга олинди. Уларнинг барчаси муқаддам мазкур ташкилот сафида содир этган жинояти учун жазо муддатини ўтаб чиққан шахслар бўлган.