Фото: Қашқадарёда 38 йил аввал фойдаланишга топширилган вилоят мусиқали драма театри қайта таъмирланди

Қашқадарёда 38 йил олдин қурилиб, фойдаланишга топширилган вилоят мусиқали драма театри қайта таъмирланиб, фойдаланишга топширилди. Бу ҳақда театрнинг 89-мавсуми очилишида иштирок этган «Дарё» мухбири хабар берди.

Маълумот берилишича, 2020 йилнинг ноябрь ойида таъмирлаш ишлари бошланган театр таъмирига салкам 17 миллиард сўм маблағ сарфланган.

Таъкидланишича, Қашқадарё вилоят мусиқали драма театрининг 89-мавсуми очилишида ўзбек театр санъати усталари — Ёқуб Аҳмедов, Ёдгор Саъдиев, Эркин Комилов ва бир нечта санъаткорлар иштирок этган.

Театрнинг 89-мавсуми очилишига бағишланган тадбирда таъкидланишича, Қашқадарё вилоят мусиқали драма театри 1932 йил Қарши ва Шаҳрисабз ҳаваскор гуруҳлари негизида ташкил этилган бўлиб, 1936 йил давлат театри мақомини олган. Театрга 1943 йил вафот этган Мулла Тўйчи Тошмуҳаммедов номини абадийлаштириш мақсадида санъаткор номи берилган. Театр биноси 1983 йил қурилиб, фойдаланишга топширилган бўлиб, 2021 йил салкам 17 миллиард сўмга қайта таъмирланган.

Эслатиб ўтамиз, Мулла Тўйчи Тошмуҳаммедов номи билан юритилаётган театрга 2016 йил Вазирлар Маҳкамаси қарори билан вилоят мусиқали драма театри номи берилган.

Очилиш маросимида шунингдек, вилоят ҳокими Зоир Мирзаев Маданият вазирлигининг «Маданият ва санъат фидокори» кўкрак нишони билан тақдирланган. Мукофотни вазир ўринбосари топширган. Сўнгра, театрнинг 89-мавсуми расман очиб, мавсум учун саҳналаштирилган саҳна кўринишлари намойиш этилган.