Кўксаройда 30 август, душанба куни бўлиб ўтган бир гуруҳ турли соҳа вакилларини тақдирлаш маросимида Президент Шавкат Мирзиёев Ўзбекистон ва Қорақалпоғистон Республикаси халқ артисти Муҳаммадали Абдуқундузовга «Меҳнат шуҳрати» орденини топширди. Актёр ўз навбатида давлат раҳбарига миннатдорчилик сўзларини билдирди. Бу ҳақда «Дарё» мухбири хабар бермоқда.
«Бу мукофотни юртимизда олиб борилаётган юксалишларда фаолроқ бўлиш учун менга берилган ишонч ёрлиғи, деб биламан. Охирги мукофотни олганимга 25 йил бўлди. Ижод қиламан, миллионлаб мухлисларим бор, лекин негадир юқоридан эътибор камроқдек туюлиб қолган эди. Умидим жамланган ҳовуз қурий деб бошлаган бир пайтда Аллоҳ менга сизни сабабчи қилди, сиз мени ушбу юксак мукофотга лойиқ кўрдингиз. Сизга минг бора қуллуқ. Сизнинг саъй-ҳаракатингиз билан тилимизда ‘Ренессанс’, ‘Янги Ўзбекистон’, деган сўзлар пайдо бўлди.
Бугун юртимизда улкан ижтимоий-иқтисодий ислоҳотлар бўляпти. Демократия ўзининг янги чўққисига чиқди ва энг муҳими Янги Ўзбекистонимизда адолат фасли ҳукм сурмоқда. Биз унинг бардавом бўлишини хоҳлаймиз. Одатда табиатда фасл ўзгариб туради, аммо биз истардикки, ана шу адолат фасли бардавом бўлсин.
Ҳурматли Президент, сиз Бобур ҳазратларининг ижоди, унинг меросини жуда яхши биласиз, қадрлайсиз. 2017 йилда зиёлилар билан учрашувда Бобур ҳақида жуда илиқ гаплар айтган эдингиз. Андижонда ҳам кўп илиқ гаплар эшитдик у зот ҳақида.
Мана шу буюк зотнинг ҳикматли сўзлари бор: ‘Бу фоний дунёда инсон номи тўрт нарсада абадий қолади: ёзилган китобларда, қурилган иморатларда, экилган дарахтлар ҳамда комил фарзандларда’. Агар ҳазратнинг ушбу сўзларини Янги Ўзбекистонимизга қиёс этсак, бугун юртимизда китоблар ёзиляпти, обидалар кўкка бўй чўзяпти, мана, Ислом цивилизацияси маркази, сизнинг раҳбарлигингизда тамал тоши қўйилган Ўзбек миллий академик драма театрининг янги биноси, боғлар барпо этиляпти, солиҳ фарзандлар камол топяпти. Демак, Янги Ўзбекистонимизнинг умри абадийликка дахлдор эканлигига ҳар биримиз иймон келтирамиз. Биз белимизни маҳкам боғлаб, Янги Ўзбекистонни яратиш йўлида ёнингизда ҳар доим камарбаста бўламиз», — деди актёр.
Изоҳ (0)