Маълум қилинишича, 30 июль куни Учтепа тумани КҲАЙ кўчасида ўтказилаётган махсус рейд тадбирида ЙПХ инспектори томонидан оқ рангли Nexia-3 русумли автоуловга тўхташ ишораси берилган, бироқ ҳайдовчи ЙПХ инспекторининг қонуний талабига бўйсунмасдан ўз ҳаракатини давом эттирган. Кўрилган чора-тадбирлар натижасида мазкур транспорт воситаси КҲАЙ ва Фарҳод кўчалари кесишмасида тўхтатилган.
ЙПХ инспектори томонидан текширилганда транспорт воситаси ҳайдовчиси 1996 йилда туғилган Э.Мадина автотранспорт воситасини техник қайд этиш гувоҳномасидан ташқари бошқа ҳужжатларни тақдим эта олмаган. Жавобгарликдан қочиб қутулиш мақсадида Э.Мадина ва унинг укаси 1999 йилда туғилган Э.Умид ИИО ходимларининг фаолиятига тўсқинлик қилиб, жанжал кўтарган.
Ушбу фуқароларга нисбатан Маъмурий жавобгарлик тўғрисидаги кодекснинг тегишли моддаларига асосан маъмурий баённома расмийлаштирилиб, автоулов вақтинча жарима майдончасига жойлаштирилган ва ҳуқуқбузарлик содир этган шахсларга нисбатан суд томонидан тегишли жазо чоралари қўлланган.
ИИВ ЙҲХББ ахборот хизматининг маълум қилишича, 30 июль куни Жиноят ишлари бўйича Учтепа тумани суди томонидан ушбу фуқаролар Маъмурий жавобгарлик тўғрисидаги кодекснинг 194-моддаси 1-қисмида назарда тутилган ҳуқуқбузарликни содир этганликда айбли деб топилган. Уларнинг ҳар бирига БҲМнинг иккидан бир қисми, яъни 122,5 минг сўм миқдорида жарима жазоси белгиланган.
Шунингдек, Тошкент шаҳар ИИББ ЙҲХБ маъмурий материалларни кўриб чиқишга масъул ходим томонидан ҳайдовчи аёлга нисбатан Маъмурий жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 2-қисми тартибида БҲМнинг 5 баравари миқдорида жарима белгиланган.
Ўтказилган текширув жараёнида Э.Мадинанинг ҳеч қайси вазир ўринбосарига алоқаси йўқлиги аниқланган.
«Шу ўринда фуқароларга эслатиб ўтамиз, бировнинг номини сотиб, ўзини кимнингдир қариндоши деб таништириш, жанжал кўтариш орқали жавобгарликдан қочиб қутулиб бўлмайди. Қонун олдида барча баробар», — дейилади баёнотда.
Аввалроқ Олмалиқда ЙПХ ходими «25 марта радарга тўлаган» қоидабузар аёлни «Абдураззоқ ака»дан бўлган қўнғироқ сабаб қўйиб юборгани тўғрисида хабар берилганди.
Изоҳ (0)