Япониялик дизайнер гугуртлардан ақл бовар қилмас стоп-моушен анимацияни яратди. Ижтимоий тармоқ фойдаланувчилари уни «сеҳргар» деб атамоқда

YouTube’да токиолик дизайнер Томохиро Окадзаки «Гугуртлар» номли ролиги машҳурликка эришди, деб хабар беради Esquire.

Видео бир неча дақиқа давом этади, аммо уни яратиш учун анча меҳнат қилинган. Январь ойидан августга қадар дизайнер Instagram’даги саҳифаси орқали гугуртлар билан боғлиқ қисқа сюрреалистик видеолар билан бўлишиб келган ва якунда улардан саккиз дақиқали битта ролик йиққан.

Дизайнер ўз ишида стоп-моушен техникасидан фойдаланган. Видеода гугуртлар турли деформацияларга учрайди, суюқлашади, ялпоқлашади, кўпаяди, буюмлар орасидан ўтади.

Окадзаки гугуртлардан ташқари оддий материаллар — қоғоз, ип, қалам ва бошқа қўл остидаги предметлардан фойдаланган.

Ижтимоий тармоқлар фойдаланувчилари японияликнинг видеосини ҳайрат билан қабул қилган. Ролик остидаги изоҳларда Окадзакини «сеҳргар», унинг ишини эса «феноменал» деб атамоқда.

Эслатиб ўтамиз, 2016 йилда япониялик дизайнерлар тирик одамдан ажратиб бўлмайдиган компьютер қизни яратганди.