Фаластиннинг ҲАМАС ҳаракати сиёсий бюроси раҳбари Исмоил Ҳония «Толибон»ни Афғонистонда «Америка истилоси» даври тугагани билан табриклади. Бу ҳақда Anadolu Agency хабар берди.
ҲАМАС маълум қилишича, Ҳония «Толибон» сиёсий идораси раҳбари мулла Абдулғани Бародар билан телефон орқали мулоқот қилган.
Ҳониянинг таъкидлашича, Афғонистон ерларини Америка босқинидан халос қилиш барча «золимлар» устидан ғалаба қозонишга имкон беради ва Фаластин ерлари Исроил томонидан босиб олинишини тугатишнинг гарови бўлади.
ҲАМАС сиёсий бюроси раҳбари Бародарни «тарихий ғалаба» билан табриклади. Ҳония Афғонистонда бирлик ва фаровонлик ҳукм суришига умид билдирди.
15 август куни «Толибон» жангарилари Кобулга кирди ва Афғонистоннинг бутун ҳудудини назорат остига олганини эълон қилди. Шу куниёқ мамлакат президенти Ашраф Ғани истеъфога чиқиб, мамлакатни тарк этди. У ўз қарорини «қон тўкилишига йўл қўймаслик истаги билан изоҳлади. Афғонистон махсус кучлари тарқатиб юборилди, аҳолидан қурол-яроғлар мусодара қилинмоқда.
«Афғонистонда уруш тугади», — дея эълон қилди «Толибон» ҳаракати расмий вакили Муҳаммад Наим Al-Jazeera телеканали эфирида.
Изоҳ (0)