Самарқанд вилояти Иштихон туманида фуқарони 17 минг доллар эвазига магистратурага киритиб қўйишни ваъда қилган шахс қўлга олинди, дея хабар бермоқда ИИВ матбуот хизмати.
Маълум қилинишича, Самарқанд вилояти Жомбой туманида яшовчи йигит ички ишлар ходимларига Қашқадарё вилояти Китоб туманида яшовчи фуқаро унга Давлат тест марказидаги танишлари орқали Самарқанд ветеринария медицинаси институти магистратурасига ўқишга киритиб қўйишини айтиб, хизмати эвазига 17 минг доллар талаб қилганини билдириб, қонуний чора кўришни сўраган.
Давлат хавфсизлик хизмати ва Ички ишлар вазирлиги вилоят бошқармалари 9 август куни тезкор тадбир ўтказиб, Самарқанд шаҳар Ислом Каримов кўчасида фуқародан пул олаётган шахсни далилий ашёлар билан қўлга олган.
Ҳолат юзасидан унга нисбатан Жиноят кодексининг 168-моддаси (фирибгарлик) 4-қисми ва 211-моддаси 3-қисми (пора бериш) билан жиноят иши қўзғатилган.
Ҳозирда тергов ҳаракатлари олиб борилмоқда.
Бундан аввал Тошкент, Бухоро ва Самарқандда фуқароларни ўқишга киритиш ҳамда ўқишини кўчириб бериш билан шуғулланмоқчи бўлган шахслар ушлангани, Бухорода ҳамшираликка ишга олиш эвазига 400 доллар олган шахс қўлга олингани ҳамда Самарқандда талабани якуний назорат имтиҳонидан ўтказиб бериш учун 550 доллар сўраган декан ўринбосари ушлангани ҳақида хабар берилганди.
Изоҳ (0)