Коррупцияга қарши курашиш агентлиги Самарқанд вилоятидаги бюджет муассасаларида қонунчилик талабларининг бузилиши билан боғлиқ айрим ҳолатларни ошкор қилди.
Қайд этилишича, агентлик томонидан ўтказилган ўрганиш давомида Самарқанд вилоятидаги бюджет ташкилотлари томонидан ходимларга иш ҳақи ва унга тенглаштирилган бошқа тўловларни тўлаш ҳамда қурилиш учун ажратилган маблағларни сохта ҳужжатлар асосида талон-торож қилиш ҳолатлари аниқланган.
Жумладан, Республика ихтисослаштирилган Онкология ва радиология илмий амалий тиббиёт маркази Самарқанд филиали мансабдорлари марказда ишловчи 54 нафар ишчи-ходимга умумий 175 миллион сўмлик туғруққача ва туғруқдан кейинги таътил, касаллик варақаси ва меҳнат таътили ҳамда устама пулларини асоссиз ҳисоблаш орқали давлат бюджетининг жуда кўп миқдордаги маблағларини растрата қилиш йўли билан талон-торож қилгани аниқланган.
Шунингдек, Самарқанд шаҳар 3-сонли туғруқ мажмуаси томонидан ходимларга иш ҳақи сифатида 50 миллион сўм ва Нарпай туман Ободонлаштириш бошқармасида жами 29 миллион сўм бюджет маблағлари қонун талабларига риоя қилинмаган ҳолда тасарруф этилгани маълум бўлган.
Вилоят прокуратура идоралари томонидан ўтказилган терговга қадар текширув натижалари бўйича мазкур ҳолатлар бўйича Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми ва бошқа моддалар билан жиноят иши қўзғатилган.
Агентлик томонидан ўтказилган ўрганишлар давомида вилоятдаги бюджет муассасаларида жами 563 миллион сўмлик бюджет маблағлари талон-торож қилингани аниқланган.
Қайд этилишича, ҳозирда вилоятдаги бошқа муассасаларда аниқланган ҳолатлар юзасидан терговга қадар текширув ишлари давом этмоқда.
Мавзуга доир:
- Ўзбекистон Экология қўмитаси ва унинг таркибидаги ташкилотлар 9,4 млрд сўмлик маблағни ноқонуний сарфлагани аниқланди
- Қашқадарёдаги боғчаларда 2021 йилнинг дастлабки 4 ойида 400 млн сўмдан ортиқ маблағ талон-торож қилинди
- Тошкент вилоятида 173 млн сўмни талон-торож қилган мактаб директорига жиноят иши қўзғатилди
Изоҳ (0)