Афғонистон президенти Ашраф Ғани ҳамда ўзбек, тожик ва ҳазара жамоатлари раҳбарлари 11 август куни «Толибон»га қарши курашда халқ қўшинларига ёрдам кўрсатиш масалалари бўйича муҳокама ўтказди. Бу ҳақда TOLOnews телеканалига таяниб Asia-Plus хабар берди.
Учрашув Афғонистон шимолидаги энг йирик шаҳар — ҳозирда «Толибон» жангарилари қуршовида бўлган Мозори-Шарифда бўлиб ўтди. Ашраф Ғани 11 август куни фуқаролик рейси билан шаҳарга келган.
Хабарга кўра, учрашувда ўзбек жамоатидан маршал Абдурашид Дўстум, тожик жамоатидан Атта Муҳаммад Нур, ҳазара жамоатидан Ҳожи-Муҳаммад Моҳакик иштирок этган. Шуниси эътиборлики, уларнинг барчаси Шимолий альянс деб аталадиган иттифоқнинг собиқ раҳбарлари. Улар 1990 йилларда «Толибон»га қарши курашган ва 2001 йилнинг кузида АҚШ армиясига Афғонистонни жангарилардан озод қилишда ёрдам берган.
«Толибон» жангарилари июндан бери Мозори-Шариф маҳаллаларига бостириб киришга уриниб келмоқда. Охирги кунларда «Толибон» қўшни вилоятларнинг маъмурий марказлари — Жузжон, Сарипул, Саманган ва Қундузни ўз назоратига олганидан кейин вазият айниқса оғирлашди.
10 августдан 11 августга ўтар кечаси «Толибон» Афғонистон шимолида жойлашган яна иккита вилоятнинг маъмурий марказини: Бадахшондаги Файзобод ва Бағлоннинг Пули Хумрини эгаллаб олди. Шунингдек, Тожикистон билан чегарадош Бадахшон вилояти ҳам «Толибон» қўлида.
Айни пайтда, Қатар пойтахти Доҳада 10 августдан бошлаб Афғонистон ҳукумати ва «Толибон» делегациялари ўртасида АҚШ, Россия ва Хитой каби бир қатор манфаатдор давлатлар дипломатлари воситачилигида уч кунлик маслаҳатлашувлар ўтказилмоқда. Улар Афғонистон ҳудудларида жанговар ҳаракатларни тўхтатиш тўғрисида маслаҳатлашмоқда.
Аввалроқ «Толибон» Афғонистон ҳудудининг 65 фоизини назорат қилаётгани ҳақида хабар берилди. Ушбу хабардан сўнг АҚШ Президенти Жо Байден Афғонистон ҳукуматини ватан учун курашишга чақирди.
Изоҳ (0)