Рани Мукержи Болливуднинг энг машҳур актрисаларидан бири саналади. Муваффақиятли карьераси давомида бир неча мукофотлар, жумладан, Filmfare Awards’ни ҳам қўлга киритиб улгурган Ранининг ҳаёти билан боғлиқ маълумотларни эътиборингизга ҳавола қиламиз.
Актриса 1978 йил 21 март куни Мумбайда дунёга келган. Отаси Рам Мукержи режиссёр ва Filmalaya Studios асосчиларидан бири, онаси Кришна Мукержи эса собиқ хонанда бўлган. Акаси Ража Мукержи ҳам кинопродюсер ва режиссёр сифатида фаолият олиб борган. Хуллас, Рани том маънода санъат муҳитида ўсиб-улғайган. Қолаверса, машҳур ҳинд актрисаси Кажол унга ота томондан қариндош, сценарий муаллифи ва кинорежиссёр Аян Мукержи эса амакиваччаси бўлади.
1994 йилда 16 яшар Ранига Жугал Хансраж билан бирга «Аа Galе Lag Jаа» фильмида суратга тушиш таклиф қилинади. Аммо отаси қизини ёш бўла туриб роль ижро қилишини истамайди. Шу сабаб унинг ўрнини Урмила Матондкар эгаллаган. Рани катта экранда илк бор 1996 йил «Тўй гуллари» номли бенгал фильмида эпизодик роль билан кўриниш берган. Айнан шу йилнинг ўзида Болливуднинг «Тўй кортежи» фильмида суратга тушган.
Амир Хон билан бирга «Толега бўйсунмас» (Ghulam) фильмида роль ўйнаганидан кейин эътибор марказига тушган, «Ҳаётда ҳамма нарса бўлади»дан кейин эса сўзсиз юлдузга айланган. Шахсий ҳаётини муҳокама қилишларини яхши кўрмаслигига қарамай, айнан у ҳамиша ОАВ учун мавзу бўлган, журналистлар уни муҳокама қилишдан чарчамаган.
Айни вақтда режиссёр Адитя Чопранинг рафиқаси бўлган Мукержи ёшлигида суратга олиш майдончасидаги бир қанча ҳамкасблари билан учрашган. Оилали Амир Хон ҳам Баччанлар оиласининг меросхўри Абҳишек ҳам қолмаган. Кичик Баччан билан муносабатларига бўлажак қайнонаси Жая Баччан ёқтирмагани сабаб барҳам берилган.
https://www.instagram.com/p/BfY3nmdBhCq/
Болаликдаги дугонаси Паял Кҳаннанинг турмуш ўртоғи Адитя Чопра билан эса узоқ вақт давомида яширинча учрашиб юрган. Кейинчалик эса жуфтлик турмуш қуришга қарор қилган. 2014 йил муносабатларини никоҳ билан мустаҳкамлаган юлдузларнинг оиласида 2015 йилда қиз фарзанд дунёга келган. Адира туғилганида актриса 37 ёшда бўлган. Айни вақтда бахтли ҳаёт кечираётган режиссёр ва актриса оилавий муносабатларни кўз-кўз қилиш ҳамда ОАВ эътиборини жалб қилишни истамайди.
2006 йилда Ранига Голливуднинг «Адаш» (The Namesake) фильмида суратга тушиш таклиф қилинган. Аммо график «Ҳеч қачон алвидо деманг» (Kabhi Alvida Naa Kehna) фильмининг тасвирга олиш жараёни билан тўғри келиб қолгани сабаб Мукержи мазкур иштирокдан воз кечган. Шундан кейин роль актриса Табуга насиб қилган.
https://www.instagram.com/p/BgTX5zEAnWe/
Ҳинд киносаноатида фаолият юритадиган аёллардан фақатгина Рани бир йилда, бир вақтнинг ўзида «Энг яхши актриса» ва «Энг яхши иккинчи даражали актриса» сифатида Filmfare мукофотини қўлга киритган. Бунга у «Сен ва мен»( Hum Tum) ҳамда «Тақдир чорраҳаси» (Yuva) фильмларидаги роли сабаб эришган.
Изоҳ (0)