Ўзбекистон бош вазири Абдулла Арипов ZF-UZ-VAC-2001 ўзбек-хитой вакцинаси билан биринчилардан бўлиб эмланган. Бу ҳақдаги ахборотни бош вазир матбуот хизмати ходими Бекзод Ҳидоятов «Дарё»га тасдиқлади.
Абдулла Арипов.
Фото: «Дарё» / Мадина Нурман
Маълум бўлишича, бош вазир Абдулла Арипов ўзбек-хитой вакцинаси билан 2021 йил бошида тўлиқ эмланиб бўлган. Уч босқичли эмланиш жараёнининг бирортасидан сўнг ҳукумат раҳбарида ножўя таъсирлар сезилмаган.
Аввалроқ президент Шавкат Мирзиёев коронавирусга қарши тўлиқ эмланиб бўлгани маълум бўлган эди. «Президентимиз масъулиятли фуқаро сифатида, албатта, вакцина олганлар. Ўша вақтда Ўзбекистонда учта вакцина — ZF-UZ-VAC-2001, AstraZeneca ва ‘Спутник V’ рўйхатдан ўтган эди. Президентимиз шу вакциналардан бири билан тўлиқ эмланганлар», — дея маълум қилганди президент матбуот котиби Шерзод Асадов 2 август куни бўлиб ўтган брифингда.
Мавзуга доир: Фото: Эмланган ўзбек амалдорлари
Хитойнинг Zhifei Longcom Biopharmaceutical компанияси томонидан ишлаб чиқилган ЗФ-2001 рекомбинант вакцинасининг учинчи босқич клиник синовлари Ўзбекистонда декабрь ойида бошланган эди. Ўзбекистонлик бир қатор юқори мартабали амалдорлар, хусусан, инновацион ривожланиш вазири Иброҳим Абдураҳмонов бутун оиласи билан шу синовларда қатнашган эди.
Февраль ойига келиб, Хитой компанияси Ўзбекистонни вакцина ҳаммуаллифи деб тан олган, шундан сўнг Ўзбекистонда қўлланилаётган эмдорининг номи ZF-UZ-VAC-2001 деб ўзгартирилган. 1 март куни вакцина Ўзбекистонда расман рўйхатга олингани маълум қилинди, 1 апрелдан эса аҳолини, хусусан, ушбу вакцина билан оммавий эмлаш ишлари бошланди.
5 август ҳолатига кўра Ўзбекистонга коронавирусга қарши 12,5 миллион дозадан ортиқ вакцина келтирилган бўлиб, шундан 8,5 миллион дозаси ZF-UZ-VAC-2001 вакцинасидир. Келгусида яна 12 миллион доза ўзбек-хитой вакцинаси келтирилиши кутилмоқда. Ўзбекистонликлар энг кўп айнан шу вакцина билан эмланмоқда — биргина 2 август куни вакцинанинг 1-дозаси билан эмланган 243 493 ўзбекистонликнинг 213 868 нафари (87 фоизи) ўзбек-хитой вакцинасини олган.
