«Бизнес билан бевосита мулоқот — ишлабилармонлик муҳитини яхшилашнинг энг самарали воситаси» мавзусида 30- июль, жума куни ўтказилган матбуот анжуманида бош вазир ўринбосари, инвестициялар ва ташқи савдо вазири Сардор Умрзоқов журналистларни ҳақоратсиз ва туҳматсиз танқид қилишга чақирди. Бу ҳақда «Дарё» мухбири Миролим Исажонов хабар бермоқда.

Умрзоқов ўз нутқида бир йил аввал ҳаётида кузатилган ҳолат ҳақида гапираркан, одамнинг шахсий ҳаётидаги видеони унинг рухсатисиз тарқатишга ҳеч кимнинг ҳақи йўқлигини таъкидлади.

Фото: «Дарё» / Мадина Нурман

«Ҳурматли оммавий ахборот воситалари вакиллари, сизлар ҳозир Янги Ўзбекистоннинг қурилишида жуда катта рол ўйнаяпсизлар. Шу билан бирга шундай ҳолатлар йўқ эмаски, биз нимагадир сенсацияни қидиришга, салбий янгилик топишга ҳаракат қиламиз, айрим ҳолатларда пашшадан фил яратиб, обуначиларимизни кўпайтирмоқчи бўламиз.

Шу ўринда ўз ҳаётимдан битта мисол келтирмоқчиман. 2020 йилнинг февралида топшириқ бўйича делегация билан Туркияга кетяпман. Унда ҳали бизга пандемия келмаган, карантин бошланмаган эди. Самолёт энди қўзғаляпти, ёнимда Савдо-саноат палатаси раиси Адҳам Икромов ўтирибди. Унга оддий, ярим ҳазил гапларни айтиб, суҳбатлашдим. Самолёт қўнганидан кейин телефонимни ёқсам, танишларимдан Telegram’имга 200 га яқин хабарлар келган, барчаси бир хил. Ҳурматли блогерларимиздан қайсидир бири самолётда мендан икки қатор орқада ўтириб, гапларимни видеога олган ва ‘Қани топинг-чи, бу қайси вазир?’ деб тарқатиб юборган. Аслида у ерда ҳеч қандай ёмон гап бўлмаган.

Мен умримнинг беш йилини Лондонда ўтказганман. Агар блогер шу ишини ўша ерда қилганида, уни судга беришарди. Чунки одамнинг шахсий ҳаётидаги видеони рухсатисиз чиқаришга ҳақи йўқ. Бизда судга бериб кўринг, шу залда ўтирган журналистлардан уч карра кўпроғи танқид остига кўмиб ташлайди: ‘Войдод, булар сўз эркинлигига қарши’, дейди», — деди ҳукумат вакили.

Унинг қайд этишича, журналист ва блогерлар танқид қилмаса, амалдорлар талтайиб кетади.

Фото: «Дарё» / Мадина Нурман

«Бизда нимага сўз эркинлиги бир тарафлама? Биз ўзимиз ўйлаган, хоҳлаган фикрни гапиришга ўргандик, бу бизга ёқяпти. Лекин айтган ва ёзган гапимизга жавобгарликни, масъулиятни сезишни хоҳламаяпмиз. Нима учун бир тарафлама? Ҳозир блогерлар, изоҳчилар ‘Бу ғўддайган, ўзидан кетган’, деб ёзиши мумкин. Аммо бу ҳақиқат, бу ҳам адолатсизлик.

Шунинг учун қарс икки қўлдан чиқади. Ишлашимиз керак, танқид қилинглар. Танқид қилмасаларингиз, биз амалдорлар талтайиб кетамиз. Бу ҳам ҳақиқат, бу ҳаёт қонуни. Лекин танқид асосланган, қонун доирасида, ҳақоратсиз ва туҳматсиз бўлиши керак», — деди Сардор Умрзоқов.