«Иш берувчи эмлашдан бош тортган ходимни ишдан ҳайдамайди, балки ишдан четлатади» – Русланбек Давлетов
Ўзбекистон адлия вазири Русланбек Давлетов 31 июль куни Олий Мажлис Сенатининг ялпи мажлисида аҳолининг айрим тоифаларига мажбурий коронавирусга қарши эмлашни қонунийлаштирадиган ва иш берувчиларга эмлашдан бош тортган ходимни ишдан четлатиш ҳуқуқини берадиган қонун ҳужжатларига ўзгартиришлар киритилгани ҳақида фикрларини билдириб ўтди. Бу ҳақда «Gazeta.uz» хабар қилди.
Унинг сўзларига кўра, агар фуқаро эмлашдан бош тортса, у ҳолда «ҳеч ким унинг қўл оёғини боғлаб, эмлаш учун тиббий муассасага олиб бормайди».
«Бундай тартиб йўқ. Бизнинг қонунчилигимизда маълум касалликлар учун мажбурий даволаниш турлари белгиланган. Булар – алкоголизм, гиёҳвандлик, сил касаллиги. Бундай ҳолларда, суд қарори асосида, улар мажбурий даволанишга юборилади. Бунда давлат, агар керак бўлса, уйга келиб, фуқарони даволаниш учун олиб кетиши мумкин. Бундай ҳолларда одам йўқ дея олмайди», – дейди вазир.
Адлия вазирлиги раҳбарининг таъкидлашича, фуқаро эмланишдан воз кечиш ҳуқуқий оқибатларга олиб келишини англаши керак.
«Бу ерда унинг ижтимоий фаолияти ва ишлаш ҳуқуқи чекланиши мумкин. Шу сабабли, Меҳнат кодексининг 113-моддасига ўзгартиришлар киритилмоқда: агар у [эмланишдан] бош тортса, ишга кела олмайди», – деди вазир.
Русланбек Давлетов таъкидлашича, Меҳнат кодексининг 100-моддасига биноан, иш берувчи ходимни ишдан бўшата олмайди.
«Кўпчилик, бу ходимни ишдан бўшатиш учун баҳона бўлади, дейишди. Йўқ бу бунга сабаб эмас. Иш берувчи Меҳнат кодексининг 100-моддасига биноан ходимни ишдан ҳайдай олмайди. Иш берувчи ходимни ишдан четлатиши – бу бошқа модда (Меҳнат кодексининг 113-моддаси), бошқа ҳуқуқий муносабатлар, бошқа вазият, бошқа моҳият», – дея аниқлик киритди у.
Адлия вазирлиги раҳбарининг таъкидлашича, Меҳнат кодексининг 113-моддасига биноан, ишчи ишга маст ҳолатда келса, мажбурий тиббий кўрикдан ўтмаса ёки тиббий комиссиялар томонидан берилган тавсияларга риоя қилмаса иш берувчи уни ишдан четлатиш ҳуқуқига эга. Ишдан четлатиш вақтинча бўлади, шунингдек, ишга қўйилмаган вақтида ходимга иш ҳақи тўланмайди.
Русланбек Давлетов вакциналар тўлиқ ўрганилмагани ҳақидаги хабарларга ҳам изоҳ берди.
«Бир нарсани тушуниш керак, ҳеч бир жамиятда илм-фан 100 фоиз қабул қилинмайди. Ундан олдин ҳам шундай бўлган ва бундан кейин ҳам шундай бўлади. Ернинг шар шаклида эканига ишонмайдиган одамлар гуруҳлари ҳали ҳам бор. Уларнинг ўз нодавлат ташкилотлари бор, улар Ер шар шаклида эмаслигига ишонтиришга ҳаракат қилади. Яъни, улар илмни инкор этади. Шунинг учун давлат фан ютуқларини ҳисобга олиб, ўз сиёсатини шу йўналишда олиб боради», – деди у.
Вазирнинг қўшимча қилишича, инсон ҳуқуқлари абсолют ҳуқуқ болиши мумкин эмас, чунки «бир кишининг ҳуқуқлари бошқаларнинг ҳуқуқлари бошланадиган жойда тугайди».
«Давлатга солиқ тўлаш мажбурияти ҳам инсон ҳуқуқларининг чекланишидир, чунки солиқлар сизнинг даромадингизни эркин тасарруф этиш ҳуқуқини чеклайди. Аммо бу қонунда белгилангани учун ҳамма солиқ тўлашга мажбурдир», – деди вазир.
Мавзуга доир: «Ўзбекистонда коронавирусга қарши эмланганлар орасида ўлим кузатилгани йўқ» — Ботир Қурбонов
Адлия вазирлиги бошлиғининг айтишича, жамоавий ҳуқуқ ва манфаатлар индивидуал ҳуқуқдан юқори туради.
«Бу ерда жамоавий иммунитет, жамоат хавфсизлиги ҳақида гап кетяпти», – дейди Русланбек Давлетов.
Эслатиб ўтамиз, сенаторлар Ўзбекистонда мажбурий эмлашни назарда тутувчи қонунни маъқуллагани ҳақида хабар берилганди.
Бундан аввал Тошкентда аҳолини Moderna вакцинаси билан эмлаш бошлангани, Ўзбекистонда ўтган бир сутка ичида яна 170 мингга яқин киши коронавирусга қарши эмлангани ҳамда Ўзбекистонда коронавирусга қарши қўлланилган вакциналар сони 7 млн дозадан ошгани ҳақида хабар берилганди.
