Таэквондо бўйича Токио—2020 Олимпиадаси чемпиони Улуғбек Рашидов ғолибликдан кейин ўз фикрлари билан ўртоқлашди.
Эҳтиросларимни таърифлашга тил ожиз. Бу йўлда иштирок этган барчага раҳмат айтаман. Шу шароитларни муҳайё қилган Президентимиз, Олимпия қўмитаси, Спорт вазирлиги ва барчага миннатдорчилик билдираман.Улуғбек 1/16 финалда малилик Сейду Мофанани 38:17 ҳисобида мағлуб этди. Ўзбекистонлик спортчи чорак финал йўлланмаси учун жангда 3 карра жаҳон чемпиони, Олимпия ўйинларининг 2 карра совриндори, ушбу вазн тоифасининг биринчи рақамли спортчиси жанубий кореялик Ли Де Ҳун билан асосий вақтда 19:19 ҳисобида қайд этди. Баҳс тақдирини ҳал қилган «Олтин зарба»да Рашидов 2 очко қўлга киритиб, чорак финалга йўл олди. Рашидов 1/4 финалда эронлик Мирҳошим Ҳуссаинини 34:22 ҳисобида енгди. Рашидов ярим финалда Босния ва Герцеговина вакили Недзад Ҳушични 28:5 ҳисобида енгиб, Ўзбекистон учун дастлабки медални нақд қилганди. Финалда эса уч раунд якунига кўра Бредли Синденни 32:29 ҳисобида мағлуб этди.Ғалабани кимга бағишлагани борасида
Бу ғалабамни амакимга бағишлайман. Тахминан 10 июлда Токиога келган бўлсак, 15 июлда амаким 68 ёшида вафот этганини эшитдим. Бу ишни унинг учун ҳам амалга оширишни ўзимга ваъда бергандим. Бу ғалабамни унга бағишлайман.
Мураббийи Павел Хан ҳақида
Бу мураббий менга жуда яқин. У қадрдоним. Унинг қўл остига келганимда 5-6 ёшда эдим. Бу йўлни у билан бирга босиб ўтдик. У энг зўр мураббий! Уч йил аввал ёшлар Олимпиадасида бу каби ютуқни қўлга киритамиз деб ўйлаб ҳам кўрмагандик. Бироқ ҳаммаси худонинг қўлида. Унга дуо қилинг ва албатта, натижа эришасиз.
Номдор рақибларга қарши кураш борасида
Болалигимда Ли Де Ҳуннинг жангларини доим томоша қилиб борардим. Буни футбол деб тасаввур қилсак, у худди Роналду ва Мессидек машҳур. У таэквондодаги энг номдор, энг машҳур спортчи. Унга қарши жанг қилиш мен учун улкан шараф бўлди. Унга қарши жанг олдидан мураббий менга шундай деди: «У 10 йилдан бери топ-даражада, 11 йил жуда кўплик қилади. Ёшларнинг ҳам вақти келди».
Финалда дуч келган британиялик рақиб ҳам жуда кучли. У 2019 йилда Де Ҳунни мағлуб этиб, жаҳон чемпионига айланганди. Ҳар бир рақиб кучли эди, бу ерда кучсизлар йўқ.
Улуғбек Рашидов, Олимпиада чемпиони
Рашидовнинг финалдаги рақиби Бредли Синден -68 кг вазн тоифасида амалдаги Жаҳон чемпиони ҳисобланади. У 2019 йилда Манчестер шаҳрида ўтказилган мусобақада ғолибликни қўлга киритганди. Синден шунингдек, ушбу вазн тоифасининг иккинчи рақамли вакили ҳисобланади.
Маълумот учун, Улуғбек Рашидов 2002 йил 23 март куни Тошкент шаҳрида туғилган.
У 2018 йилда Буэнос-Айресда (Аргентина) бўлиб ўтган 2018 йилги ёзги ўсмирлар Олимпия ўйинларида 48 килограммгача вазн тоифасида кумуш медалини қўлга киритган, финалда россиялик спортчи Дмитрий Шишкога имкониятни бой бериб қўйган.
2019 йилда эса таэквондо бўйича ўсмирлар ўртасидаги Осиё чемпионатида 55 килограммгача вазн тоифасида олтин медалга эга чиққан. Худди шу йили у Бутунжаҳон армия ўйинларида 58 килограммгача вазн тоифасида олтин медални қўлга киритади, Улуғбек ҳал қилувчи баҳсда хитойлик рақиби Лян Юйшуайни таслим этганди.
Изоҳ (0)