Токио—2020 Олимпиадасининг 25 июль, якшанба кунги мусобақалари ўтказилмоқда.
Спорт гимнастикаси бўйича Ўзбекистон номидан иштирок этган Оксана Чусовитина саралаш баҳсидаги иштирокини якунлади. Оксана таяниб сакраш йўналишида 14.166 очко жамғариб, 11-ўринни эгаллади ва финал йўлланмасини қўлга кирита олмади. Қайд этиш лозим, олдинда спортчиларнинг яна бир гуруҳи бор. Агар ушбу гуруҳдан ҳеч ким Оксанадан яхшироқ натижа кўрсата олмаса, у 11-ўринда қолади.
Шу тариқа 46 ёшли Оксана ўзининг 8-Олимпиадасида иштирок этди ва бу борада мутлақ рекордчига айланди. Оксана ушбу Олимпиада профессионал фаолиятидаги сўнггиси бўлишини маълум қилди.
Эслатиб ўтамиз, Миллий олимпия қўмитаси матбуот хизмати Олимпиада очилиш маросимида Ўзбекистоннинг икки байроқдоридан бири Оксана Чусовитина бўлишини эълон қилинганди. Иккинчиси эса бокс бўйича терма жамоа аъзоси Бобоусмон Ботуров бўлиши лозим эди. Бироқ очилиш маросимига бир кун қолганда байроқдорлар ўзгарди ва маросимда боксчи Баҳодир Жалолов ва таэквондочи Нигора Турсунқулова Ўзбекистон байроқдорлари бўлиши эълон қилинди.
Мазкур ҳолат юзасидан МОҚ бош котиби Ойбек Қосимов баёнот берган, Ўзбекистон байроқдорларини танлашда ҳар бир спорт тури бўйича мусобақалар тақвими, шунингдек, барча делегатлар ва спортчиларнинг фикри инобатга олингани ҳақида айтганди.
Оксана Чусовитина байроқдорлар ўзгаргани борасида ҳеч ким унга изоҳ ва тушунтириш бермагани, бу воқеадан кейин иштиёқи сўнгани ҳақида гапирди.
Туризм ва спорт вазирлиги эса ўз баёнотида Чусовитина ўзининг сўнгги Олимпиадасига жиддий ҳозирлик кўриш мақсадида ўз ўрнини бўшатгани ҳақида маълум қилди.
Изоҳ (0)