Бокс бўйича -63 кг вазн тоифасида Ўзбекистон шарафини ҳимоя қилаётган Элнур Абдураимов 25 июль куни Токио—2020 Олимпиадасидаги иштирокини бошлади.
1/16 финалда ўзбекистонлик боксчи Мўғулистон вакили Чинзориг Баатарсухга қарши жанг қилди. Дастлабки раунд тенг курашлар остида ўтди ва ҳакамларнинг уч нафари Чинзоригнинг ғалабасини қайд этди. Иккинчи раунд эса тўлиғича Элнур томонида бўлди.
Ҳал қилувчи раундда ҳам фаолроқ бўлган Элнур якунда 4:1 ҳисобдаги ғалабани қўлга киритиб, 1/8 финалга йўл олди. Нимчорак финалда Абдураимов тожикистонлик Баҳодур Усмоновга қарши рингга кўтарилади.
Қайд этиш керак, бу Абдураимов ва Баатарсух ўртасидаги учинчи жанг бўлди. Май ойида Элнур Осиё чемпионати ярим финалида Чинзоригга ютқазиб қўйганди. Ундан аввал эса улар Иорданиядаги лицензион мусобақада тўқнаш келган ва унда ўзбекистонлик боксчининг қўли баланд келганди.
Изоҳ (0)