Шавкат Мирзиёев аҳоли мурожаатлари билан ишлаш тизимини янгича ташкил қилиш чора-тадбирлари бўйича видеоселектор йиғилишида халққа мурожаат қилиб, коронавирус пандемиясидан огоҳ бўлишга чақирди.
«Фурсатдан фойдаланиб халқимизга мурожаат қилмоқчиман. Жуда эҳтиёт бўлайлик, пандемия нималарга қодир эканини кўрсатяпти. Бу кўринмас душман биз билан жуда катта кураш олиб боряпти.
Шунинг учун вакцинация, вакцинация яна бир марта вакцинация. Жуда катта машаққатлар билан вакциналарни олиб келяпмиз. 4 август куни яна 3 миллион янги доза Америкадан келадиган бўлди. Мана 2,5 миллион доза вакцинамиз бор, лекин ҳали ҳам одамларимиз вакцинага ишонмаяпти, жуда катта йўқотиш бўляпти ораларимизда.
Мана шу тартибимиз, интизомимиз ҳар биримизни соғлиғимизга эътибор қилишга яна бир бор даъват қилмоқчиман, бутун халқимизга мурожаат қилиб.
Бефарқ бўлмайлик, кўринмас душман олдимизда юрибди. Мана кўряпсизлар, шифохоналаримиз тўлиб кетди яна. Ҳамма ерни ёпган эдик биз бир пайтлар, қандай оғир келди ҳозирги пандемия. Қачон тугайди ҳеч ким билмайди», – дейди Шавкат Мирзиёев.
Бундан аввал Ўзбекистонда коронавирусга қарши қўлланилган вакциналар сони 6 млн дозага яқинлашгани ҳамда ижтимоий тармоқларда вакцина бўйича саволлар билан юзланган профессор видеоси юзасидан Инновацион ривожланиш вазирлиги баёнот бергани ҳақида хабар берилганди.
Изоҳ (0)