Яккабоғ тумани ҳокими Лутфиддин Абдуллаев матбуот котиби Шерзод Ҳасановнинг блогер Элмурод Одилов телефонини тортиб олиб, флешкасидаги видеоларни ўчириб ташлаганини салбий баҳолашини билдирди. Бу ҳақда ҳоким иштирокидаги матбуот анжуманида маълум қилинди, дея хабар берди «Дарё» мухбири.
Қайд этилишича, Яккабоғ ҳокими Лутфиддин Абдуллаев сўнгги пайтларда туманда юз бераётган шов-шувли воқеалар — блогер устидан ИИБга шикоят қилиниши, ҳокимлик матбуот котиби томонидан блогернинг телефони тортиб олиниб, видеолари ўчирилиши каби масалаларни изоҳлаш мақсадида ОАВ вакиллари учун пресс-тур ташкил қилган.
Пресс-тур давомида ташкил этилган матбуот анжуманида сўз олган ҳоким Лутфиддин Абдуллаев журналист ва блогерлар саволига жавобан, матбуот котиби Шерзод Ҳасановнинг блогер телефонини тортиб олганини ва телефондаги видеоларни ўчириб юборганини изоҳлар экан, матбуот котибининг бу ҳаракатини салбий баҳолаганини, бунинг учун унга танбеҳ берганини билдирди.
«Аввало ҳар иккаласидан ҳам айб ўтган. Иккаласи ҳам ёш бўлишига қарамасдан, бир-бирига ёмон муносабатда бўлиб, шов-шувга сабаб бўлган. Матбуот котибимнинг ишини ижобий баҳоламайман ва бу ҳақда ўзига айтиб, тушунтирганман. Иккаласи ҳам ёш йигитлар келишиб, масалани охиригача етиб, ёритишса бўларди. Блогер холис ёритмаяпти деган гапга келадиган бўлсак, бунга ўзим ҳам гувоҳ бўляпман. Кўтарилган муаммони шахсан ўзим бориб ўрганиб кўрганимда, ҳақиқий ҳолат бошқача бўлиб чиқяпти. Аммо ўша ҳолатни биз ижтимоий тармоқларга олиб чиқиб, фуқарони уялтирмаяпмиз. Боиси, унинг фарзандлари, яқинлари бор. Биз бу маълумотларни чиқарсак, у кишига нисбатан салбий муносабатлар уйғониб, маънавий зарар етказиб қўйишимиз мумкин. Шунинг учун блогер ҳам муаммони аввал обдон ўрганиб, иккинчи томон фикрини ҳам эшитиб, кейин ёритса мақсадга мувофиқ бўларди», — деди Лутфиддин Абдуллаев.
Яккабоғ ҳокими, шунингдек, туманда фаолият юритувчи блогерлар 60 сотих сувли ер майдони бор, уйининг фундаменти унча-мунча одамнинг уйи фундаментидан зўр уй эгасини қийналган, муаммо гирдобида қолган фуқаро сифатида олиб чиқаётганини айтиб, ‘Уйида 60 сотих сувли ери бўлса-ю, ишламаса. Бу инсофдан эмас-ку’, деган.
Эслатиб ўтамиз, аввалроқ туман ҳокими матбуот котиби Шерзод Ҳасанов ва блогер Элмурод Одилов ўртасида муаммо келиб чиққанди. Ҳокимлик вакили фуқаролар мурожаатини ўрганиб, видеотасвирга олган блогернинг ёнига бориб, уни холис ёритмасликда айблагани, блогернинг телефонини тортиб олгани, шунингдек, блогер устидан туман ИИБга шикоят қилиниб, Элмурод Одилов конституцион тузумга тажовузда айбланаётгани хабар берилганди.
Изоҳ (0)