Тошкент вилояти Олмалиқ шаҳрида ака-ука ва бошқа бир йигит ўртасида жанжал юзага келган. Бу ҳақда ИИВ хабар қилди.
Қайд этилишича, 8 июль куни Тошкент вилояти Олмалиқ шаҳрида жойлашган «Олмалиқ деҳқон бозори» МЧЖ ҳудудида мева ва полиз маҳсулотлари сотиш билан шуғулланувчилар ака-ука 29 ёшли Б. ва 22 ёшли И. ҳамда 1996 йилда туғилган 25 ёшли К. ўртасида ўзаро гап талашиш оқибатида жанжал келиб чиққан.
Жанжал вақтида К. қўли билан Б.ни урган вақтида жанжалга И. (Б.нинг укаси) қўшилган ва қўлида бўлган ошхона пичоғи билан К.нинг кўкрак қисмига бир маротаба уриб, тан жароҳати етказган.
Оқибатда 25 ёшда бўлган К. олган тан жароҳати билан Олмалиқ шаҳар тиббиёт бирлашмасининг жонлантириш бўлимида вафот этган.
Мазкур ҳолат юзасидан Олмалиқ шаҳар прокуратураси томонидан Жиноят кодексининг 97-моддаси 2-қисми «ж» банди (ўта шафқатсизлик билан одам ўлдириш) билан жиноят иши қўзғатилиб, дастлабки тергов ҳаракатлари олиб борилмоқда.
Бундан аввал Сурхондарёда онасини ҳақорат қилган қариндошини пичоқлаб ўлдирган шахсга жиноий иш очилгани, Бухорода 63 ёшли эркак ер талашиб, синглисини пичоқлаб қўйгани ҳамда Жиззахда хотинини хиёнат қилишда айблаб, уни ўлдириб қўйган шахс 14 йилга қамалгани ҳақида хабар берилганди.
Изоҳ (0)