Коронавирусга қарши курашиш штаби аъзоси Нурмат Отабеков Ўзбекистонда нега кескин, қаттиқ карантин чоралари киритилмаётганига жавоб берди.
«Карантин ва чеклов талаблари кескин ва қаттиқ талаблар асосида амалга ошириладиган бўлса, бу кўп оилаларни ҳаёт тарзи, уларнинг иқтисодий аҳволини танг ҳолатга келтириб қўйиш нуқтайи назаридан бу каби тадбирларни ўтказишга, кескин чораларни қўллашга қўл урилмаяпти.
Албатта, бу каби тадбирларни қўллаб, вазиятни тезда барқарорлаштиришга эришиш мумкин бўлади. Вазиятга қараб қўшимча чекловлар киритиб келиняпти», – дейди Нурмат Отабеков.
Республикада эмлаш тадбирлари суст олиб борилаётгани, уни мажбурий ва пуллик қилиб қўйиш бўйича мутахассис қуйидагиларни маълум қилди.
«Республика бўйича эмлашнинг тўлиқ курсини олган фуқаролар сони 700 мингта яқинлашди. Эмлашнинг турли босқичларини олганлар сони 4 миллион 200 мингдан кўпроқ. Бу рақам кам. Қачонки аҳолининг 60–70 фоизини эмламас эканмиз, вазиятни барқарор ушлаш имконсиз.
Вакцинани мажбурий қилиш тўғри фикр. Балки, Россияда қўлланилаётган амалиёт, яъни эмланмаган одамларни ишга қўймаслик амалиётини татбиқ қилиш керакдир. Лекин ҳозирча Ўзбекистонда вакциналар текин ва ихтиёрий равишда амалга оширилади», – дейди Нурмат Отабеков.
Маълумот учун, Ўзбекистонда 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди. 5 июлдан бошлаб эса барча турдаги оммавий тадбирларни ўтказиш вақтинча тўхтатилди. 1 августдан эса тўй ва маросимларни 50 кишидан кўп бўлмаган ҳолда ўтказиш белгиланди.
Изоҳ (0)