Тошкент шаҳри Юнусобод туманида «Тошиссиққувати» ДУКнинг айрим мансабдорларига жиноий иш қўзғатилди, дея хабар қилмоқда Бош прокуратура ҳузуридаги департамент матбуот хизмати.
Қайд этилишича, департаментнинг Юнусобод туман бўлими томонидан ўтказилган терговга қадар текширувда, «Тошиссиққувати» Юнусобод тумани иссиқлик тарқатиш бўлими масъуллари сув ҳисоблагичларнинг сертификатлари тегишли тартибда рўйхатдан ўтказмагани, марказлашган базага маълумотлар ўз вақтида киритилмагани оқибатида 61 та истеъмолчи томонидан 110,5 миллион сўмлик нореал қарздорликни вужудга келишига йўл қўйган.
Шунингдек, 31 миллион сўм муддати ўтган дебитор қарздорликни ундириш чоралари кўрмасдан келаётгани натижасида давлат манфаатларига зарар етказилгани аниқланган.
Мазкур ҳолат юзасидан Жиноят кодексининг 207-моддаси (мансабга совуққонлик билан қараш) билан жиноят иши қўзғатилиб, тергов ҳаракатлари ўтказилмоқда.
Бундан аввал Самарқанд ва Қаршида ерни ноқонуний равишда сотаётган собиқ мансабдор ва ҳокимлик вакили ушлангани, Жиззах шаҳар ҳокимининг қарорига келтирилган протестини танишлари орқали бекор қилдириш учун 2,5 минг доллар талаб қилган шахс қўлга олингани ҳамда Фарғонада босқинчиликда айбланганлар суд залидан қочиб кетиши юзасидан ИИБ мансабдорларига жиноий иш очилгани ҳақида хабар берилганди.
Изоҳ (0)