Сирли ўлим топган жаҳон юлдузлари (фото)

Кино ва мусиқа саноатида ўз ўрнига эга бўлган, аммо бевақт ўлими таажжубларга сабаб бўлган юлдузлар ҳақида маълумот бериб ўтамиз.

Натали Вуд

Актриса 1981 йил ноябрда Калифорния соҳилида яхтада сайр қилиш учун отланган. Бортда, шунингдек, унинг турмуш ўртоғи Роберт Вагнер, оилавий дўстлари Кристофер Уокен ва капитан Деннис Деверн ҳам бўлган. Аммо шунга қарамай, улардан уч киши тирик қайтган. Бир неча кун ўтиб сувдан Наталининг танаси топилган. Роберт, Кристофер ва Деннис Наталининг ўлимида алоқадор эмаслигини исботлашга уринган. Улар актриса кечаси уйқуга ётгани, эртаси куни эса жойида бўлмаганини таъкидлаган. Сувга ғарқ бўлиш ўлимга сабаб қилиб кўрсатилган ва иш ёпилган. Аммо 30 йил ўтиб ҳаммаси бошқача бўлгани ҳақида маълумот пайдо бўлди. Капитан ДеннисДеверн «Алвидо, Натали, алвидо, Сплендоур» номли мемуарида 1981 йил адвокатларнинг босими сабаб Робертни версиясини маъқуллагани, айрим муҳим жиҳатларни яширганини маълум қилган. У шунингдек, актрисани йўқ бўлиб қолишидан аввал эри билан тортишганини кўргани, Роберт унга ўлдириш билан таҳдид қилганини қўшимча қилган. Иш қайта очилган ва актриса ўлимининг боиси «тасодифан сувга ғарқ бўлишдан», «сувга ғарқ бўлиш ва бошқа сабаблар»га ўзгартирилган. 2018 йилда яхтадаги ҳолатни кўрган бошқа гувоҳлар ҳам пайдо бўлгани маълум қилинган. Шунга қарамай, Роберт Вагнерни қамоққа олиш учун етарли далил тўпланмаган.

Майкл Жексон

Дунё бўйлаб концерт беришга тайёргарлик кўраётган «поп қироли» 2009 йил 25 июнда вафот этган. Терговда Жексоннинг ўлимига уйқу дориларини ҳаддан ортиқ қабул қилиш сабаб бўлган деган хулосага келинган. Оқибатда дори воситаларини қабул қилишни нотўғри схемасини буюрган даволовчи шифокор қамоққа олинган. Шунга қарамай, қўшиқчининг мухлислари кредит билан боғлиқ қарзларидан қочиш (2009 йилда унинг қарзлари 400 миллион долларни ташкил қилган) ва омма назаридан чарчагани сабаб Майкл ўз ўлимини саҳналаштирган деб ҳисоблаган. Айримлар ҳатто Жексонни турли мамлакатларда тирик, соғ ва бахтли кўрганини таъкидлаган.

Бриттани Мерфи

2009 йилнинг машҳур актрисаси «Саккизинчи мил», «Калтафаҳмлар» сингари фильмларда суратга тушган Бриттанининг 32 ёшида вафот этгани мухлислар учун кутилмаган бўлган. Суд тиббий экспертизаси актрисанинг ўлимига юрак хуружи сабаб бўлган деб хулоса қилган. Мазкур версияга кўпчилик, хусусан, Бриттанининг отаси ҳам ишонмаган. У алоҳида лабораторияда текширтирганида қизининг сочидан оғир, токсик металлар бўлгани аниқланган. Ушбу ғалати далил отанинг қизини ўлдирилган деб гумон қилишига сабаб бўлган. Ярим йил ўтиб актрисанинг 40 яшар турмуш ўртоғи ҳам вафот этган. Шундан кейин Мерфининг отаси қизи ва куёвининг ўлимида Америка махсус хизматининг қўли борлигини маълум қилган. Гап шундаки, Мерфининг коррупцияда айбланган собиқ амалдорни қўллаб-қувватлагани айримларга ёқмаган. Уйини тун-у кун қўриқлатиш ва кузатув камераларидан фойдалангани Бриттанининг ҳаётини сақлаб қололмаган. Унинг ўлими билан боғлиқ иш аллақачон ёпилганига қарамай, аслида нима бўлгани билан боғлиқ тахминлар ҳали ҳамон тугаганича йўқ.

Курт Кобейн

Nirvana гуруҳининг 27 яшар солисти 1994 йил апрелда ўз уйида ўлик ҳолда топилган. Ўлик тана олдида қолдирилган хат, уни ўз жонига қасд қилган деб хулоса қилишга сабаб бўлган. Аммо қоғоздан хонанданинг қўл излари топилмагани ва текширув жараёнида организмидан жуда ҳам катта миқдорда наркотик топилгани шубҳалар пайдо бўлишига сабаб бўлган. Мухлислар унинг ўлимига рафиқаси Кортни Лавни айбдор деб билган. Жуфтликнинг сўнгги вақтларда муносабатлари яхши бўлмаган, агар Курт ажрашиш учун ариза берса Кортнини бир чақасиз қолиши аниқ бўлган. Шундан келиб чиқиб айримлар Лав эрининг давлатига эгалик қилиш учун уни ўлдирган деб ҳисоблаган. Аммо табиийки Кортни бу айбловларни тан олмаган.

Мерилин Монро

Мерилин Монро 1962 йил 5 августда ўз уйида ўлик ҳолда топилган. Хонасидан медикаментларнинг сон-саноқсиз ўрами топилгани туфайли унинг ўлимига барбитуратлардан заҳарланиш сабаб бўлган деган хулосага келинган. Шунга қарамай, унинг вафоти билан боғлиқ турли тахминлар пайдо бўла бошлаган. Айримлар Жон Кеннеди билан муносабатлари оммага овоза маълум бўлмаслиги учун махсус хизмат уни тинчитишга қарор қилган деб ҳисобласа, бошқалар уни ўлдиришга собиқ севгилиси, жиноят оламида танишлари кўп бўлган Фрэнк Санатра буюртма берган деб ўйлаган. 2015 йилда АҚШ Марказий разведка бошқармасининг собиқ офицери Норман Хожес, актрисани бошлиғи Жимми Хейворт буйруғига асосан ўлдирганини тан олган. Шунингдек, Жим ҳаммаси ўз жонига суиқасддек кўриниши кераклигини айтгани, буни барини Америка учун қилгани, Монро коммунистларга стратегик маълумотни етказиши мумкин бўлганини таъкидлаган. Унинг сўзлари қанчалик рост ёки ёлғонлиги мавҳумлигича қолган, у ва унинг бошлиғи ҳам ҳаётдан кўз юмган.

Телма Тодд

Актрисанинг танаси 1935 йил 15 декабрда ўз машинасида ўлик ҳолда топилган. Текширишларга асосланиб Телма ис газидан вафот этган деган хулосага келинган. Аммо журналистлар бошқа версияларга ҳам эътибор қаратган. Таъкидланишича, актрисага тегишли деб ҳисобланадиган «Thelma Todd’s Sidewalk Café»си Голливудни назорат қиладиган мафиозларга тегишли бўлган. Аммо продюсер Роланд Уэстни яхши кўриб қолган актриса бошқарувни унга берган ва бу ҳақида бошлиқларни огоҳлантирмаган. Кейинчалик актрисага 10 000 доллар беришини сўраб таҳдидлар кела бошлаган. Аммо актриса бунга эътибор бермаган. Бошқа бир версияда у ўлимидан аввал «Trocadero» ресторанига боргани, ўлимидан кейин ошқозонидан топилган яшил нўхат ва дуккакли таомлар ресторан менюсида бўлмагани таъкидланган. Ушбу зиёфатдаги меҳмонларга Телма бир неча соатдан кейин қандайдир киши билан кўришиши кераклигини айтган. Аммо журналистлар ушбу номаълум шахс кимлиги, актрисанинг фожиали тақдирида қандай рол ўйнаганини аниқлашга муваффақ бўлмаган.