Мексиканинг Pemex нефть-газ компаниясининг Мексика кўрфазидаги денгиз қувур линиясида кучли ёнғин содир бўлди, ёнғин 78 метр чуқурликдаги сув остидан кўтарилган. Ҳодисадан жабрланганлар йўқ, дея хабар берди «РИА Новости» маҳаллий ОАВга таяниб.
«Эрталаб соат 4 да Кампеч штати, Сьюдад-дель-Кармен соҳилига қарама-қарши Мексика кўрфази сувларида Ku-Charly платформасидан 400 метр узоқликда жойлашган денгиз қувурида ёнғин қайд этилди», — деб ёзади Telvisa.
Ku-Charly денгиз платформаси йирик Ku Maloob Zaap мажмуаси таркибида ишлайди. Бу энг йирик нефть конларидан бири бўлиб, унда кунига 95 минг баррель нефть қазиб олинади.
Ёнғин беш соатдан кейин ўчирилган, ҳодиса жойида учта ўт ўчирувчи кема иш олиб борган. Pemex компанияси ёнғин сабабларини ўрганмоқда. Дастлабки маълумотларга кўра, бунга денгиз платформалари орасидаги қувур назорат клапанларидан углеводородлар оқиб чиқиши сабаб бўлган.
Изоҳ (0)