Олий Мажлис Қонунчилик палатаси депутати Расул Кушербаев Ўзбекистонда 2 июлдан айрим ижтимоий тармоқларга чекловлар ўрнатилганига муносабат билдирди.
«Ўзбекистонда қонун талабларига зид равишда фуқароларнинг шахсга доир маълумотларига ишлов бераётган ижтимоий тармоқлардан фойдаланиш чекланибди. Мен қарши бўлган фойдасиз қонун», – дея ёзди депутат Расул Кушербаев ўзининг Telegram каналида.
Депутатнинг таъкидлашича, фуқароларнинг шахсга доир маълумотларини муҳофаза қилиш баҳонаси билан интернетдаги оммабоп тармоқларни чеклашга уринишдек кўринаётган бу иш кўпроқ салбий оқибатга олиб келиши мумкин.
Масалан, фойдаланувчилар оммавий равишда чекловларни четлаб ўтувчи VPN каби дастурлардан фойдаланишни бошлайди, назорат буткул йўқолади. Бу фуқароларни қонунбузарга айланишга мажбур қилади.
«Танкка қарши кетмон билан жанг қилишдек ‘ахборот асриъдаги жуда кулгили ва абсурд қарор», – дея қўшимча қилди Расул Кушербаев.
Бундан аввал Ўзбекистонда TikTok ва Twitter’нинг очилиши секинлашгани ҳақида хабар берилганди. Кейинроқ «Ўзкомназорат» Ўзбекистонда айрим ижтимоий тармоқлардан фойдаланиш расман чекланганини маълум қилди.