Тошкент шаҳар ҳокимлиги пойтахтдаги «Универсал» спорт мажмуасида 700 койка-ўринга мўлжалланган ковид-марказ ишга тушгани тасвирланган видео билан бўлишди.
Кадр: Telegram
Видеодан кўриш мумкинки, Тошкент ҳокими Жаҳонгир Ортиқхўжаев ушбу марказга бориб, яратилган шароитлар билан танишган. Унга ҳамроҳлик қилган Ички ишлар вазирлиги масъулларининг сўзларига кўра, мазкур ковид-марказ 700 койка-ўринга мўлжалланган бўлиб, унинг 50 таси ўта оғир даражадаги беморлар учун реанимация бўлими вазифасини бажаради.
Таъкидланишича, марказда барча нарса шай ҳолатга келтирилган ва беморларни кутиб олиш учун шифокорлар гуруҳи жалб қилинган.
Шунингдек, Тошкент ҳокими 5 июлдан «Ўзэкспомарказ» кўргазма мажмуаси базасида 700 ўринлик тақсимлаш марказининг ишини қайта йўлга қўйиш бўйича топшириқ берган.
Аввалроқ Тошкент шаҳрида ДХХ тасарруфидаги «Ёшлик» спорт мажмуасида ковид-марказ қайтадан ташкил этилгани тўғрисида хабар берилганди.
Эслатиб ўтамиз, 2020 йил ноябрь ойининг охирларида «Атлас» ва «Ёшлик» коронавирусга ихтисослашган марказлари, 2020 йил 9 декабрь куни эса «Ўзэкспомарказ»даги ковид-марказ ёпилганди. Ўшанда касаллик динамикаси ошганда ёпилган объектлар тезкор равишда қайта очилиши маълум қилинганди.
Мамлакатда кунлик касалланиш ҳолатлари сони яна ортиб бормоқда. Шу сабабли республика бўйлаб 28 июндан карантин чекловлари кучайтирилди. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилди.
