Тошкент вилояти Бўстонлиқ туманида жойлашган «Белдирсой оромгоҳи» дам олиш маскани дор йўли билан бирга сотилиши мумкин. Бу ҳақда Давлат активларини бошқариш агентлиги матбуот хизмати маълум қилди.

Эслатиб ўтамиз, агентлик «Малика» савдо мажмуаси, «Сижжак», «Белдирсой» ва бошқа бир неча йирик объектлар сотувга қўйилганини маълум қилганди. Уларнинг учтаси — «Ичан қалъа» меҳмонхонаси, ДХХнинг собиқ марказий биноси, «Газета корпуси» ўз эгасини топди. Spot’нинг қайд этишича, яна учтаси («Малика» савдо мажмуаси, «Қизил сув» дам олиш маскани ва «Пойтахт» бизнес маркази) бўйича талабгорлар таклифларини кўриб чиқиш давом этмоқда.

Тошкент вилоятидаги иккита дам олиш маскани — «Сижжак»ва «Белдирсой»га эса ҳозирча харидор йўқ. Шу сабабли ушбу объектлар бўйича талабгорлардан таклифларни қабул қилиш муддати 15 июлга қадар узайтирилди. Бу таклифларни қабул қилиш бўйича муддатнинг иккинчи марта узайтирилиши. Бундан аввал 1 июлга қадар узайтирилганди.

Агентликнинг билдиришича, айни пайтда «Белдирсой оромгоҳи» дам олиш масканига туташ ҳудудда жойлашган спорт базаси (канат йўли)ни қўшиб, бутун мажмуа сифатида сотиш масаласи ўрганиб чиқилмоқда.

«Сижжак» дам олиш масканида эса меҳмонхона, бир нечта ҳовуз, амфитеатр, коттеж ва бошқа иншоотлар мавжуд. У 2017 йилга қадар Ўзбекистон Биринчи Президенти Ислом Каримовнинг тўнғич қизи Гулнора Каримовага тегишли бўлган.