Тошкентга кириш-чиқиш бўйича ўрнатилган чеклов тартиби ўзгартирилиши мумкин
100487
Тошкент шаҳрига қўшни вилоятлардан кириш бўйича ўрнатилган чеклов тез орада ўзгартирилиши (эҳтимол, бекор қилиниши) кутилмоқда. Бу ҳақда Ички ишлар вазирлиги ахборот хизмати «Дарё»га маълум қилди.
Фото: «Дарё» / Дилшод Шарипов
Соғлиқни сақлаш вазирлигининг таклифига биноан Республика махсус комиссиясининг қарорлари билан 2021 йил 28 июнидан 12 июлига қадар Тошкент шаҳрига қўшни вилоятлардан автотранспорт (автобус, автомобиль) воситалари орқали ўта зарурат бўлмаган ҳолларда кириш бўйича чекловлар ўрнатилиши белгиланганди. Чеклов кимларга татбиқ этилмаслиги ҳам ишлаб чиқилганди. 27 июндан бошлаб Тошкент вилоятидан Тошкент шаҳрига олиб чиқувчи йўллар бетон тўсиқлар билан беркитила бошланганди. Шаҳарга кириб-чиқиш фақат йўл-патруль постларида ташкил қилиниши кутилаётганди.
Чекловлар сабаб пойтахтдан Тошкент вилояти ҳудудига чиқувчи автобуслар ҳаракати ЙПХ пост масканигача ташкил қилиниши ҳақида «Тошшаҳартрансхизмат» ахборот ҳам берганди.
ИИВ ахборот хизматининг «Дарё»га хабар қилишича, 27 июнь куни тунда «ушбу тўсиқларни жорий этмаслик бўйича топшириқ келган». Айни дамда амалда Тошкент шаҳрига кириш ва чиқиш бўйича чекловлар йўқ. Махсус комиссиянинг Тошкентга киришни чеклаш бўйича аввалги қарорига янги қарор билан ўзгартиришлар киритилиши мумкин. Маълумотларга кўра, қарор келишиш жараёнида, яқин вақт ичида расман эълон қилиниши кутилмоқда.
28 июнь куни Тошкент вилоятидан Тошкент шаҳрига ўтган «Дарё» муҳаррири йўл-патруль постида ҳеч қандай чекловлар қўлланмаётганига гувоҳ бўлган. Аммо шаҳарга олиб чиқувчи кўчаларга ўрнатилган бетон тўсиқлар ҳозирча олинмаган.
Хабар чоп этилгандан сўнг ИИВнинг расмий Telegram-каналида «Ўзбекистон Республикаси Махсус комиссиясининг Тошкент шаҳрига кириш-чиқиш бўйича расмий чекловлари билан боғлиқ ўзгаришлар фақатгина расмий манбалар орқали эълон қилиниши» маълум қилинди. «Расмий бўлмаган маълумотларни тарқатмаслигингизни сўраймиз», — дейилади ИИВ ахборот хизмати хабарида.
Эслатиб ўтамиз, 25 июнь куни коронавирус инфекциясини юқтириб олиш билан боғлиқ 546 та янги ҳолат рўйхатга олиниб, кунлик касалланиш бўйича 2021 йилнинг энг юқори кўрсаткичи бўлганди. Мамлакатда кунлик касалланиш ҳолатлари сони яна ортиб бормоқда. Шу сабабли Республика бўйлаб 28 июндан карантин чекловлари кучайтирилиши белгиланганди. Республика бўйлаб кўнгилочар ва овқатланиш объектлари фаолиятига чекловлар ўрнатилади. Бундан ташқари, Тошкентда 18 ёшдан ошганлар 28 июндан коронавирусга қарши оммавий эмланади.
