Ўзбекистон ун ва гўшт нархларини Россия билан махсус поездларни ишга тушириш орқали барқарорлаштиради

UzAgroLogistics Center агрологистика маркази, РЖД Логистика АЖ ва «Россия экспорт маркази» АЖ Россия—Ўзбекистон логистика коридорини ривожлантириш ҳамда агросаноат импорт ва экспорт юкларини «Агроэкспресс» тезюрар рефрижераторли контейнерли поездларида ташиш борасида ҳамкорлик бўйича келишув имзолади. Бу ҳақда Қишлоқ хўжалиги вазирлиги хабар берди.

Ҳужжатда «Агроэкспресс» контейнерли тезюрар темир йўл поездлари ҳаракатини йўлга қўйиш орқали Россия—Ўзбекистон логистика коридори лойиҳасини ривожлантириш ва қўллаб-қувватлаш соҳасида томонларнинг ўзаро манфаатли ҳамкорлигини такомиллаштириш назарда тутилган. Бундан ташқари, нохом ашёвий ноэнергетик экспортни ривожлантириш, транспорт хизматлари экспорти, шунингдек, бошқа ҳамроҳ иш ва хизматларни тараққий эттириш соҳасида ҳамкорликдаги лойиҳаларни амалга ошириш кўзда тутилган.

«2021 йилнинг биринчи чорагида Россиядан Ўзбекистонга экспорт ташишлар ҳажми беш фоизга ошди ва деярли бир миллиард долларни ташкил этди. Лойиҳанинг тўлақонли ишга туширилиши ўзаро манфаатли маршрутларни шакллантиради ва россиялик экспортчиларни комплекс логистика хизмати ҳамда Россия маҳсулотларини узилишларсиз Ўзбекистонга етказиш канали билан таъминлайди, бу эса ўз навбатида икки мамлакатнинг йиллик товар айланмаси кўрсаткичларини янги сифат босқичига кўтаради», — дейди  «Россия экспорт маркази» бош директори Вероника Никишина.

Telegram’даги «Нигоҳ» каналининг ёзишича, Ўзбекистонда ун ва гўшт нархларини мазкур «Агроэкспресс» поездларини ишга тушириш орқали барқарорлаштириш режалаштирилмоқда.

«Гап ҳатто ташиш учун энг нозик ҳисобланган юкларнинг ҳам бутлигини кафолатлайдиган рефрижераторли контейнерли поездлар ҳақида кетмоқда: Ўзбекистон мева ва сабзавотларни юборади эвазига эса гўшт ва ун олади», — дейилади хабарда.

Ўзбекистондан Россияга дастлабки синов «Агроэкспресс»ни (қарийб 40 вагон) 2021 йилнинг кузида жўнатиш режалаштирилган.