Инновацион ривожланиш вазири, академик Иброҳим Абдураҳмонов Анҳуи Zhifei Longcom Biopharmaceutical Co.Ltd компанияси раиси Ли Ван Жун ва профессор Чен Фан Гу билан мулоқот ўтказди, дея хабар бермоқда вазирлик.
Мулоқот давомида Хитой–Ўзбекистон ҳамкорлигида яратилган ZF-UZ-VAC2001 вакцинасининг коронавируснинг турли вариантларга қарши ҳимояси тўғрисида олинган илмий натижалар ҳақида сўз борди.
Текширув натижалари ҳақида иккита илмий мақола тайёрланган бўлиб, улар билан қуйидаги ҳаволалар орқали танишиш мумкин: https://doi.org/10.1038/с41422... ва https://doi.org/10.1101/2021.0...
Мазкур икки тадқиқот ZF-UZ-VAC2001 вакцинаси COVID-19 вирусининг айни вақтда дунёда тарқалган «африканча» (501Й.В2) ва «британча» (D614G) вариантларидан ҳимоя қила олишини тасдиқламоқда.
Мулоқот давомида ҳозирда олимлар Ҳиндистондан тарқалган дельта-вариант устида ҳам тадқиқотлар олиб бораётганлари, бу ҳақда мақола ҳали чоп этилмагани, аммо натижалар ижобий бўлаётгани ҳақида фикр алмашилган.
Лаборатория текширувлари вакцинацияланган одам зардоби ҳам, ҳайвонлар зардоби ҳам дельта вариантга қарши ҳимояланганини намоён этган. Айни пайтда маълумотлар таснифланмоқда ва мақола яқин кунларда чоп этилиши кутилмоқда.
Маълум қилинишича, ҳозиргача Хитойда 90 миллион аҳоли ZF-UZ-VAC2001 вакцинаси билан эмланган. Уларнинг аксарияти вакцинанинг биринчи ва иккинчи дозаларини олган. Шу пайтгача мазкур вакцина билан эмланганлар орасида коронавирусга чалинганлар аниқланмаган.
Эслатиб ўтамиз, Ўзбекистонда 24 июнь куни коронавируснинг «ҳиндча» штамми аниқланди. Нурмат Отабеков «дастлабки лаборатория текширув натижалари ушбу тахминни катта эҳтимол билан тасдиқлагани»ни маълум қилди.
Изоҳ (0)