ЖАРда бирйўла ўн фарзандли бўлганини эълон қилган аёл руҳий шифохонага ётқизилди

Жанубий Африка Республикаси (ЖАР)да бирйўла 10 фарзандни дунёга келтиргани айтилган 37 ёшли Гозиам Ситхол руҳий касалликлар шифохонасига ётқизилди. Бу ҳақда Daily Mail хабар берди.

Аёлнинг эри полицияга мурожаат қилиб, Ситхол ғойиб бўлганини ва 8 июнь куни, у ўнта бола дунёга келтирганини эълон қилганидан кейин дарҳол алоқаларни узганини айтди.

Республикада амалда бўлган руҳий саломатлик тўғрисидаги қонунга кўра, гумонланувчи текширув учун 72 соат давомида ушлаб турилиши мумкин. Полиция аёлни ҳибсга олиб, кейин ваколатли хизматларга топширди. Текширув шуни кўрсатдики, аёл ўтган йили ҳомиладор бўлмаган.

Ситхолнинг турмуш ўртоғи маълум қилишича, аёл туғруқни амалга оширган шифохона ҳам ушбу маълумотни тасдиқлай олмади. Улар аёлга ҳеч қандай тиббий хизмат кўрсатилмаганини таъкидлади. Республика Соғлиқни сақлаш вазирлиги июнь ойида ҳеч бир касалхонада бир аёлнинг шунча чақалоқ дунёга келтиргани рўйхатга олинмаганини қўшимча қилди.

Ҳозир Ситхол Йоханнесбургдаги касалхонага ётқизилган ва шифокорлар назорати остида. Аёлнинг адвокати Рефилой Макойнанинг сўзларига кўра, Ситхол тиббий муассасада мажбуран сақланмоқда, у судга мурожаат қилади.

Эслатиб ўтамиз, 8 июнь куни кечқурун Гозиам Ситхол Претория касалхонасида кесарча кесиш йўли билан бирйўла ўнта фарзанд дунёга келтиргани ҳақида хабар тарқалди. Хабарларда чақалоқлар етти ўғил ва уч қиз экани айтилган.

9 июнь куни ЖАР ҳукумати бирйўла 10 фарзандни дунёга келтирган аёлни топа олмаётганини, шу сабабли мамлакат тиббиёт муассасаларида бундай туғилиш содир бўлганини тасдиқлай олмаслигини маълум қилди.