Тошкент шаҳри Учтепа туманининг 8 та даҳасида истиқомат қилувчи аҳоли ички ишлар вазирига очиқ хат билан чиқиб, тумандаги дорихоналарда ёшлар гиёҳванд моддалар сифатида истеъмол қиладиган тақиқланган дори воситалари сотилаётгани маълум қилди. ИИВ Жиноят қидирув бош бошқармасининг хабар беришича, мазкур жамоавий мурожаат ўрганиб чиқилиб, назоратга олинган.
Маълум қилинишича, Тошкент шаҳрида назорат остидаги дори-дармонларни, шунингдек, гиёҳвандлик воситаларини ноқонуний тарқалиши ва ОИВ инфекциясини тарқатишга қарши курашиш йўналишида 2021 йилда ўтказилиши белгиланган профилактик тадбирлар ишлаб чиқилган. Бундан ташқари, бошқа ҳуқуқни муҳофаза қилиш органлари билан ҳам бу борада ҳамкорлик қилиб келинмоқда.
Шунингдек, республиканинг бошқа ҳудудларида ушбу профилактик тадбирларни ўтказиш мақсадида ИИВнинг тегишли кўрсатмаси ишлаб чиқилган ва ижро учун жойларга юборилган.
Ўтказилган тезкор-қидирув тадбирлари давомида Тошкент шаҳрида жойлашган дорихоналарда кучли таъсир қилувчи моддаларни ноқонуний реализацияси билан боғлиқ 37 та ҳолат аниқланиб, жами 62 337 дона кучли таъсир қилувчи дори воситалари ноқонуний муомаладан олинган.
«Жамоавий мурожаатда кўрсатилган ҳудудларда жойлашган жами 9 та дорихоналарда тезкор-қидирув тадбирлари ўтказилиб, ноқонуний муомаладан 2 518 дона назорат остидаги дори воситалари олинди. Ҳозирда ушбу мурожаат асосида тезкор-қидирув тадбирлари давом эттирилмоқда», — дейилади хабарда.
Аввалроқ Тошкентда қарийб 100 миллион сўмлик кучли таъсир қилувчи дори воситаларининг ноқонуний айланмасига чек қўйилгани, Тошкентда кучли таъсир қилувчи дори воситалари савдоси билан шуғулланган жиноий гуруҳ қўлга олингани ҳақида хабар берилган эди.
Изоҳ (0)