Наманганда Ўзбекистон мудофаасига кўмаклашувчи «Ватанпарвар» ташкилоти вилоят кенгаши томонидан журналист ва блогерлар ўртасида ўқ отиш мусобақаси ўтказилди. Бу ҳақда «Дарё» мухбири Азизбек Абдувалиев хабар бермоқда.
«Ватанпарвар» тасарруфидаги ўқ отиш мажмуасида илк бор ташкил этилган мазкур мусобақада 60 нафардан ортиқ журналист, оператор ва блогер мерганликда ўзини синаб кўрди.
Улар орасида аёллар ҳам оз эмас эди.
— ОАВ ходимлари учун спортнинг техник-амалий турлари бўйича мусобақа ташкил қилишни анчадан бери режалаштириб юрардик. Уларнинг касб байрамлари арафасида бу режани амалга оширдик. Мусобақа уларга ҳам маъқул келди деган умиддаман, чунки ораларида илк бор ўқ отиш мажмуасига келган ва қўлига пневматик қурол тутганлар ҳам кўп экан. Келгусида бундай турнирларни мунтазам уюштириб бориш ва ўқ отиш қаторига картингни ҳам киритиш ниятидамиз, — дейди вилоят кенгаши раиси Аҳмаджон Аълохўжаев.
Мусобақада биринчи ўринни Наманган вилоят телерадиокомпанияси оператори Дилмурод Мусаев, иккинчи ўринни вилоят Ахборот ва оммавий коммуникациялар бошқармаси бошлиғи Алибек Эргашев, учинчи ўринни эса ЎзА фотомухбири Ҳотам Мамадалиев қўлга киритди.
Уларга ташкилотчиларнинг дипломлари ва қимматбаҳо совғалари тақдим этилди.
Шунингдек, мусобақага келган ҳар бир журналист ва блогерга 27 июнь — Матбуот ва оммавий ахборот воситалари куни муносабати билан эсдалик совғалари топширилди.
Изоҳ (0)