16 июнь куни 00:30 ларда Жиззах вилояти Зомин туманида ўзаро жанжаллашаётган икки фуқарони ажратишга уринган йигитлар пичоқланди. Бу ҳақда ИИВ матбуот хизмати хабар берди.
Маълум қилинишича, туманнинг «Обиҳаёт» қишлоғида яшовчи Д.Б. исмли фуқаро Nexia’сида чойхонада ўтирган укаси, амакиваччаси ва ҳамқишлоғини олиб уйига кетаётган вақтида «Оқтепа» маҳалласидаги дўкон олдида турган танишини кўриб қолган.
Ҳайдовчи йигит ўша таниши билан сўрашиш учун олдига боради ва ўртада ўзаро келишмовчилик юзага келган. Ҳайдовчининг укаси ва амакиваччаси ҳам жанжалга аралашиб, калтакланаётган йигитнинг уч нафар синфдоши уларни ажратишга ҳаракат қилган. Ҳайдовчи эса машинасида бўлган ошхона пичоғи билан синфдошлардан бири — Ж.Х.нинг қорин қисмига уриб, жароҳат етказган. Шунингдек, Д.Б. фуқаро Ж.Х.нинг укасини (10-синф ўқувчиси) оёғига ҳам пичоқ санчиб олган.
Оқибатда жабрланувчилар туман тиббиёт бирлашмасининг шошилинч бўлимига ётқизилган.
Ҳолат юзасидан Жиноят кодексининг 277-моддаси (безорилик) 3-қисми «г» банди билан жиноят иши қўзғатилиб, Д.Б. ҳибсга олинган. Айни вақтда тергов ҳаракатлари олиб борилмоқда.
Аввалроқ Ургутда «Жигули» ва Captiva ҳайдовчилари бир-бирига йўл бермаслиги оқибатида жанжал келиб чиққани ва оқибатда икки киши жароҳатлангани, Навоийда маст ака-ука ресторанда жанжал кўтариб, официантнинг бўйнига ўроқ санчиб олгани тўғрисида хабар берилганди.
Изоҳ (0)