Фотосаёҳат: Қишда 10 кунлаб ташқи дунёдан узилиб қоладиган Кўл қишлоғи — суратларда

«Дарё» интернет нашрида қиш фаслида ёғган қалин қор сабаб ўн кунлаб ташқи дунёдан узилиб қоладиган Кўл қишлоғи ҳақида батафсил маълумот берилган эди. Қашқадарё вилоятининг Шаҳрисабз туманида жойлашган ушбу ҳудуд масъулларнинг эътиборсизлиги сабаб йиллар давомида ривожланишдан ортда қолгани ҳам бор гап, албатта.

2020 йилдаги пандемия сабаб қишлоққа боролмаган «Дарё» мухбири 2021 йилнинг 20 июнь куни яна шу қишлоқда бўлди.

Қаҳратон қишнинг қорли кунларида ўн кунлаб ташқи дунёдан узилиб қоладиган қишлоқ — Шаҳрисабз туманининг Кўл қишлоғи туман марказидан 84 километр узоқликда жойлашган бўлса-да, йўлнинг оғирлиги сабаб йўловчилар туман маркази ва қишлоқ ўртасидаги масофани уч соатда босиб ўтади.

Илгари қишлоққа йўл олган киши Ҳисорак қишлоғидан сўнг «Нива» ёки «УАЗ» русумли автомобиллар хизматига эҳтиёж сезарди. Айни кунда қишлоқ йўли анча текисланиб, машиналар қатнови учун қулай ҳолатга келтирилган. Бироқ йўлдаги жарликларнинг қулаши, тош юмалаши каби хавф-хатарлар ҳамон мавжуд. Автомобильлар хизмати эса ҳалигача қиммат нархда.

«Дарё» мухбири билан суҳбатлашган «Кўл» МФЙ раиси Исмоил Бобоевнинг маълумот беришича, қишлоқ ҳақида интернетда ҳикоя қилингач, кўплаб ўзгаришлар амалга оширилган.

«Вилоят ҳокими Зоир Мирзаевнинг шахсан ўзи қишлоғимизда тунаб қолиб, аҳоли муаммоларини батафсил ўрганди. Вилоят раҳбари ташрифидан сўнг, қишлоқ аҳлига йиллар давомида хизмат кўрсатиб келган тез тиббий ёрдам машинаси янгиланди. Қишда қишлоқ йўлларини қордан тозаловчи янги техника олиб берилди. Янги мактаб қурилди. Энди эса 150 ўринли давлат боғчаси қурилиши режалаштирилмоқда», — дейди МФЙ раиси Исмоил Бобоев.

Кўл қишлоғида яшовчи фуқароларнинг айтишича, жорий йилдаги об-ҳаво инжиқликлари боис қишлоқда баҳор фасли кутилганидек бўлмаган. Аммо шунга қарамасдан, аҳоли деҳқончилик қилиб картошка етиштиришда давом этмоқда.

Эслатиб ўтамиз, мазкур қишлоқда айни кунда 1336 нафар аҳоли яшайди.