Тошкент халқаро аэропорти 21 июнь куни Туркистон шаҳридан Қозоғистоннинг FlyArystan лоукостери биринчи рейсини қабул қилди, деб хабар бермоқда «Gazeta.uz». У 180 нафар йўловчини олиб келган.
Қайд этилишича, эндиликда мунтазам рейслар 21 июндан бошлаб ҳафтасига икки марта — душанба ва пайшанба кунлари Airbus А320 самолётларида амалга оширилади. Чипталар нархи бир томонга 870 минг сўмдан бошланади, парвоз давомийлиги 50 дақиқани ташкил этади.
Қозоғистон лоукостери Туркистондан ташқари, Олмаота ва Нурсултонга ҳам рейсларни таклиф қилмоқда.
FlyArystan — Қозоғистоннинг биринчи ҳамёнбоп лоукостери бўлиб, илк парвозини 2019 йилнинг май ойида амалга оширган. Бугунги кунда FlyArystan флотида 10 дона Airbus А320 самолёти мавжуд бўлиб, ҳар куни Қозоғистон бўйлаб ва хорижга 70 дан ортиқ рейсларни амалга ошириб келмоқда.
Аввалроқ Uzbekistan Airways 15 июнь куни Домодедово аэропортига 2021 йилдаги илк парвозини амалга оширгани, SkyUp лоукостери Ўзбекистонга мунтазам авиақатновларга Украинадан рухсат олгани, Ўзбекистон томон рухсат бериши қолгани ҳақида хабар берилган эди.
Изоҳ (0)