Евро—2020 мусобақаси гуруҳ босқичининг 2-тур ўйинлари 19 июнь куни ўз якунига етди. Кўплаб жамоалар кейинги босқич масаласини ҳал қилиб қўйган бўлса, айрим гуруҳларда вазият чигал бўлиб турибди. «Дарё» Европада тўрт йилликнинг энг нуфузли мусобақасининг 2-тур натижаларига қисқача тўхталиб ўтади.

А гуруҳи

Италия терма жамоаси иккинчи турда Швейцарияни ҳам йирик ҳисобда мағлуб этиб, муддатидан аввал плей-офф масаласини ҳал қилди. Бироқ жамоа ҳали биринчи ўринни нақд қилгани йўқ. Италия 20 июнь кунги Уэльсга ўйинда ютқазмаса бўлгани, биринчи ўрин билан кейинги босқичга чиқади. Уэльс Туркиянинг мағлуб этиш орқали плей-офф босқичини деярли ҳал қилди. Туркия Швейцарияга қарши ўйин олдидан жуда қийин вазиятда жамоа бирорта ҳам очко тўплай олгани йўқ, бунинг устига тўплар нисбатидаги фарқ минус бешга тенг. Турклар 3-ўрин билан кейинги босқичга чиқиш учун йирик ҳисобда ғалаба қозониши ва кейинги гуруҳлардаги вазиятни кузатишга мажбур.

B гуруҳи

Бельгия Данияга қарши кечган қийин ўйинда иродали ғалабани қўлга киритди ва муддатидан аввал 1/8 финалга йўл олди. Сўнгги турда «қизил иблислар» дебютант Финляндияга қарши баҳс олиб боради. Россия эса финларни минимал ҳисобда енгди. Омадсиз Дания сўнгги турда русларга қарши ўйнайди. Бу ўйиндаги ғалаба данияликларни кейинги босқичга олиб чиқиши мумкин, бироқ бошқа гуруҳлардаги вазиятни кузатишга тўғри келади.

C гуруҳи

Нидерландия иккинчи турда Австрияни таслим этиб, биринчи бўлиб гуруҳ пешқадамлигини нақд қилди. Сўнгги турда Шимолий Македонияга қарши ўйин натижаси «учар голландлар» учун муҳим эмас. Украина ва Австрия эса 3-турда иккинчи ўрин масаласини ҳал қилади. Дуранг ҳар икки жамоани нимчорак финалга олиб чиқиши мумкин.

D гуруҳи

Англия терма жамоаси иккинчи турда Шотландия билан базўр дуранг ўйнади. Супер таркибга эга инглизлар самарадорлик борасида паст кўрсаткич қайд этяпти. Чехия иккинчи турда ҳам иродали ўйин намойиш қилди ва Хорватиядан очко тортиб олди. Англия ва Чехия ўртасидаги сўнгги тур ўйини пешқадамни аниқлаб беради. Хорватия ва Шотландияда ҳам имкониятлар сақланиб турибди. Бироқ сўнгги турдаги дуранг уларни кейинги босқичдан маҳрум қилади.

E гуруҳи

Швеция Словакияни мағлуб этган ҳолда ўз имкониятларини яхшилаб олди. Испания эса Польша билан дуранг ўйнади. Сўнгги турда испанлар Словакия билан ўйнайди, бу ўйинда уларга фақат ғалаба керак бўлади. Польша эса кейинги босқичга чиқишни истаса Шведларни ютишига тўғри келади.

F гуруҳи

«Ўлим гуруҳи»да ҳам вазият чигал. Германияга имкон қолдирмаган Франция терма жамоаси иккинчи турда кутилмаганда аутсайдер Венгрия билан дуранг ўйнади. Немислар эса амалдаги чемпион Португалияни имконсиз қолдирди. Сўнгги турда Германия Венгрия билан ўйнайди, Французлар эса Португалияга қарши баҳс олиб боради.

Тўпурарлар ва ассистентлар

Иккинчи турда Криштиану Роналду ва Патрик Шик бир мартадан рақиб дарвозасини ишғол қилган ҳолда, учта гол билан тўпурарлар пойгаси етакчисига айланди.

2-тур рақамларда

• Дарвозаларга жами 27 та тўп киритилди. Фақат Англия—Шотландия баҳсида гол урилмади. Энг сермаҳсул ўйин: Португалия — Германия 2:4;
• Ортда қолган икки турда фақат икки жамоа гол ура олмади — Туркия ва Шотландия;
• Шимолий Македония — 2-турдан кейин плей-оффга чиқа олмаслиги маълум бўлган ягона жамоа;
• Иккинчи турда ҳам Испания тўпга эгалик қилишда етакчи (76,4%), кейинги ўринларда Франция (66,5%) ва Туркия (63,1%);
• Килиан Мбаппе — рақиб жарима майдонида тўпга тегиниш бўйича етакчи (14). Мората (12) иккинчи, Дзюба ва Йилмаз (10 тадан) учинчи;
• Энг кўп голли вазият яратган футболчи — Гарет Бэйл (5);
• Энг кўп қоида бузган футболчилар: Торган Азар (6), Бурак Йилмаз (5), Аттила Фиола, Роберт Левандовски ва Кай Ҳаверц (4 тадан).