Наманган шаҳридаги «Афсоналар водийси» боғида амфитеатрида ёшлар ва спорт фестивали бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Фестивальда Токио-2020 олимпия ва паралимпия ўйинларида иштирок этиш йўлланмасини қўлга киритган, шунингдек, мамлакат, Осиё ва жаҳон чемпионатларида муносиб иштирок этган наманганлик спортчилар тақдирланди.
Жумладан, Токио олимпиадасида иштирок этиш йўлланмасини қўлга киритган боксчи Шаҳноза Юнусова ва ўқ отувчи мерган Мухтасар Тоҳировага Nexia-3 автомобили топширилди.
Шунингдек, мамлакат, Осиё ва жаҳон чемпионатларида юқори натижаларни қайд этган спортчиларга пул мукофотлари тақдим этилди.
Тадбирда иштирок этган Туризм ва спорт вазири ўринбосари Авазбек Каримов Наманган вилояти ҳокими Шавкат Абдураззақовга спорт ривожига қўшган ҳиссаси учун «Спорт аълочиси» кўкрак нишонини топширди.
Маълумот учун, Намангандан ҳозирги кунгача 9 нафар спортчи Токио-2020 олимпия ва паралимпия ўйинларига йўлланмани қўлга киритди. Бу вилоят спорти тарихидаги энг яхши натижа ҳисобланади.
