Президент Шавкат Мирзиёев 18 июнь куни Андижон вилоятидаги фаоллар билан йиғилишда сув таъминоти масалаларига ҳам тўхталиб ўтди, деб хабар бермоқда «Gazeta.uz».
Давлат раҳбари сўзларига кўра, вилоятда бу йили 162 миллиард сўм марказлашган маблағлар ҳисобидан 460 километр ичимлик суви, 23 километр канализация тармоғи, 95 та сув иншооти қурилади ва реконструкция қилинади. Натижада 117 та маҳалладаги 200 минг аҳолининг ичимлик сув таъминоти яхшиланади ва 37 минг аҳоли канализацияга уланади.
Қайд этилишича, 480 та маҳалладаги 1 375 километр ички йўллар ва 6 та кўприкни қайта қуриш ва таъмирлашни 1 октябргача якунлаши керак.
Вилоятда 2021 йилда 1 147 километр электр узатиш тармоқлари, 300 дан ортиқ трансформатор пунктларини қуриш ва капитал таъмирлаш ишлари амалга оширилмоқда. Натижада 571 та маҳалла ҳамда 2 374 та ижтимоий соҳа ва тадбиркорлик объектининг электр таъминоти яхшиланиши кўзда тутилган.
«Бу йил Жаҳон банки иштирокида қиймати 36 миллион доллар бўлган ‘Андижон шаҳрининг иссиқлик таъминоти тизимини реконструкция қилиш ва самарадорлигини ошириш’ лойиҳасини бошлаймиз. Лойиҳа доирасида 3 та янги қозон ва 24 километр иссиқлик узатиш тармоқлари қурилади, 271 та кўп қаватли уй ва 32 та ижтимоий соҳа объектида алоҳида ишлайдиган иситиш ускуналари ўрнатилади», — деган Президент.
Икки ой муддатда ушбу лойиҳа бўйича тендер савдоларини ўтказиб, қурилиш ишларини бошланиши белгиланди.
Бундан ташқари Шавкат Мирзиёев Бобур шоҳ кўчаси ва Марказий темир йўл вокзалини боғлайдиган кўприк қурилиши ҳақида маълум қилган.
«Яна бир йирик лойиҳа — Бобур шоҳкўчасининг икки қисмини боғлайдиган ва Марказий темир йўл вокзали устидан ўтадиган, 700 метр узунликдаги кўприк қурилади. Натижада масофа 5 километрга, вақт сарфи эса 25 фоизга қисқариб, Андижон аҳлининг неча йиллик орзу-ниятлари амалга ошади», — деб таъкидлаган давлат раҳбари.
Бундан аввал Янги Андижон шаҳрида метро қурилиши мумкинлиги, Андижонда мураккаб операцияларга муҳтож, эҳтиёжманд аҳолига ёрдам бериш бўйича махсус жамғарма ташкил этилиши ҳақида хабар берилганди.
Изоҳ (0)