Ўзбекистон Президентининг фармойиши билан Алишер Абдулахатович Қодиров Қашқадарё вилояти давлат солиқ бошқармаси бошлиғи этиб тайинланди. Бу ҳақда Давлат солиқ қўмитаси матбуот хизмати хабар қилди.

Маълумот учун, Алишер Қодиров 1975 йилда Қашқадарё вилоятида туғилган. Маълумоти олий. 1994 йилда Самарқанд молия техникумини, 2004 йилда Қарши муҳандислик-иқтисодиёт институтини, 2009 йилда Тошкент давлат юридик институтини тамомлаган.

У солиқ органларидаги фаолиятини 1992 йилда Қашқадарё вилояти Қарши шаҳар давлат солиқ инспекцияси Солиқ тушумларини жамлаш ва назорат қилиш бўлими давлат солиқ инспекторлигидан бошлаган.

Алишер Қодиров янги лавозимга тайинлангунга қадар Қашқадарё вилояти давлат солиқ бошқармаси бошлиғининг биринчи ўринбосари лавозимида фаолият юритиб келаётган эди.

Алишер Абдулахатович Қодиров Солиқ хизматининг I даражали маслаҳатчиси ҳисобланади.

Бундан аввал Чилонзор туманига янги ҳоким тайинлангани, Самарқанд вилояти ИИБ бошлиғининг биринчи ўринбосари Сирдарё вилояти ИИБга бошлиқ бўлгани ҳамда ФВВ бош бошқарма бошлиғи Бектемир туманига янги ҳоким этиб тайинлангани ҳақида хабар берилганди.