Килиан Мбаппе фаолиятидаги энг яхши ўйинини айтди

«ПСЖ» ҳужумчиси Килиан Мбаппе Чемпионлар Лигаси 1/8 финалидан ўрин олган «Барселона»га қарши ўйин (4:1) ҳақидаги хотиралари билан ўртоқлашди.

Бу менинг фаолиятимдаги энг яхши ўйиним, чунки у мукаммал бўлганди. Мен жамоага ҳужумда ҳам, ҳимояда ҳам ёрдам бергандим. Ҳужумларни яратиш, уларни якунлаш ва яккама-якка ҳолатларда ҳам муваффақият қозонгандим.

Агар статистикалар тўғри бўлса, мен ўша ўйинда дуэлларимнинг 90 фоизида ютиб чиққанман. Бутун ўйин давомида ўзимни кучсиз ҳис қилган бир лаҳза ҳам бўлмаган.

Килиан Мбаппе, «ПСЖ» ҳужумчиси

Мбаппе 2018 йилдан бери парижликлар сафида ҳаракат қилиб келади. Унинг жамоа билан амалдаги шартномаси 2022 йилнинг ёзига қадар мўлжалланган.

22 ёшли футболчи Франция чемпионатининг 2020/21 йилги мавсумида 30 та ўйин ўтказиб, 26 та гол ва 7 та голли узатма муаллифига айланди.