Президент Шавкат Мирзиёев 2 июнь куни Сурхондарё вилояти фаоллари билан учрашувда вилоятни янада ривожлантириш бўйича вазирлар ва ҳокимларга тегишли топшириқлар бергани, бунинг натижасини эса аҳоли, албатта, ҳис қилиши кераклигини таъкидлади, деб хабар бермоқда «Gazeta.uz».
«Сурхондарёда 100 минг киши ишсиз, 80 минг нафари чет элда… Ҳокимлар бўйинбоғини ечиб қўйиб, ҳафтада бир кун фуқаролар орасида юриб, масалаларни ҳал қилса, мен улардан рози бўламан… Тошкент кўмак бериши керак, лекин вилоятлар ўзининг аравасини ўзи тортиши керак», — деб таъкидлаган Президент.
Давлат раҳбари депутатлар одамларнинг муаммоларини ўрганмаётгани ҳақида ҳам гапирди.
«Мана, кеча кўплаб одамлар ‘Президент билан учрашишим керак’, деяпти. Улар ҳам бизнинг халқ. Нимага депутатлар бориб гаплашмайди? Нимага уларнинг муаммосини ўрганмайди? Қилса бўлади-ку… Мени қоғоздаги рақамлар қониқтирмайди. Халқни рози қилмасак, уларни ишонтирмасак, эртага улар бизни қўллаб-қувватламайди. Шунинг учун бугун масалани ўртага қўйинглар, савол беринглар. Мен Сурхондарёга муаммоларни ҳал қилиш учун келганман», — деган у.
Давлат раҳбари вилоят жамоатчилик вакиллари, вазирлик ва идоралар раҳбарлари билан ўтказилган ушбу йиғилишда 4 та сектор раҳбарларининг одамлар олдидаги масъулиятини ошириш ҳақида ҳам сўзлаган.
«Сизлар ўз ҳудудингиздаги муаммони билмайсизми? Дод деганларнинг уйига боринглар, яхшидан кўра ёмоннинг уйига боринглар, уларнинг тилидан эшитинглар, кўринглар ва улар тушунадиган тилда гапиринглар. Кабинетга қоровуллик қилиш ўрнига одамлар олдига, уйига бориб, муаммоларни ҳал қилиш керак. Ёшлар, хотин-қизлар, темир дафтар бўйича ишлаш керак», — деган Президент.
Эслатиб ўтамиз, Шавкат Мирзиёев 2021 йилнинг бошида ўтказган йиғилишда айрим вазир ва ҳокимлар етарлича ишламаётганини танқид қилганди. «Шунча ваъзхонлик етади, уларга қанча имкониятлар бердик, аммо самарали натижа кўрсатишмади. Бошқача ишлаш вақти келди», — деган эди Президент.
Изоҳ (0)