Хитой жанубидаги Гуанчжоу шаҳри ҳукумати коронавирус авж олиши туфайли бир нечта кўчаларни ёпиб қўйди, деб ёзади «РБК». Шу кўчаларда яшовчи фуқаролар уйларидан чиқиши тақиқланди.
Бунда гап Ливан туманидаги бешта кўча ҳақида бормоқда. Шаҳар маъмурияти тўртта кўчада эпидемия хавфи паст даражадан ўрта даражага кўтарилганини билдирмоқда.
Ушбу кўчаларда битта оиланинг фақат бир вакили энг зарур буюмларни сотиб олиш учун уйдан чиқиши мумкин. Бу туманда барча кўнгилочар муассасалар, ёпиқ спорт иншоотлари, улгуржи бозорлар ва болалар муассасалари ёпилиши шарт. Ресторанлар фақат уйга олиб кетиш учун ишлайди. Мактаблар эса дарсларни бекор қилади (бошланғич ва юқори синфлардан ташқари).
29 май ҳолатига кўра, Гуанчжоуда COVID-19’га чалиниш билан боғлиқ олтита ҳолат аниқланган бўлиб, шуларнинг бештасида касаллик симптомсиз кечмоқда. 21 майдан буён шаҳарда 20 киши касалланган, уларнинг 15 нафарида вирус яширин шаклда кечмоқда. Ҳукумат фикрича, коронавируснинг авж олиши вируснинг «ҳиндча» штаммини юқтириб олган 75 ёшли эркак билан боғлиқ. Касалланганларнинг қолгани айнан у билан мулоқотда бўлган.
Янги коронавируснинг авж олиши илк бор Хитойнинг Ухань шаҳрида қайд этилган. Аввалроқ АҚШ Вакиллар палатасининг разведка бўйича қўмитасидаги республикачилар вируснинг лабораторияда яратилгани борасида «жиддий билвосита далиллар» борлигини маълум қилганди. Уларнинг маълумотларига кўра, COVID-19 пандемиясига Ухань вирусология институтидан вирус сизиб чиқиши сабаб бўлган бўлиши мумкин.
АҚШдаги Хитой элчихонаси бу айбловларни рад этиб, ўз навбатида, Вашингтон «коронавируснинг келиб чиқиши мавзуси бўйича эътиборни ўзига жалб қилиш билан боғлиқ эски сиёсий ҳийладан фойдаланиш»га уринаётганини айтди.
Кейинроқ Америка президенти Жо Байден разведка COVID-19’нинг келиб чиқиши бўйича иккита — касалланган ҳайвондан юққани ва лабораториядан сизиб чиққани ҳақидаги вариантларни истисно қилмаслигини маълум қилди.
Изоҳ (0)