Нукусда БАА фонди 27 млн долларга 100 кишилик шифохона қуради
Қорақалпоғистоннинг Нукус шаҳрида БАА Халифа бин Бин Зоид Ол Нахаён номидаги хайрия жамғармаси грант маблағлари ҳисобидан замонавий она ва бола шифохонаси барпо этилади. Бу ҳақда Инвестициялар ва ташқи савдо вазирлиги матбуот хизмати хабар берди.
Маблағлар ажратиш Ўзбекистонда ижтимоий лойиҳаларни амалга оширишга БАА Халифа бин Бин Зоид Ол Нахаён номидаги хайрия жамғармасининг техник кўмагини жалб этиш бўйича БАА ва Ўзбекистон ўртасида ҳамкорлик тўғрисидаги ҳукуматлараро битимда кўзда тутилган.
Ҳужжат 26 май куни видеоконференция шаклида Ўзбекистон инвестициялар ва ташқи савдо вазирининг ўринбосари Шуҳрат Вафоев ва БАА молия вазирининг ўринбосари Юнис Ҳожи Ал-Хурий томонидан имзоланган.
Хабарда айтилишича, лойиҳанинг умумий қиймати 27 миллион долларни ташкил этади ва молиялаштирилиши тўлиқ Халифа бин Бин Зоид Ол Нахаён жамғармасининг грант маблағлари ҳисобидан амалга оширилади.
Янги шифохона 100 беморга мўлжалланган. У дизайн ва техник жиҳозлари бўйича ҳудудда ягона бўлган тўғруқолди ва туғруқ бўлимлари, оналар ва янги туғилган чақалоқлар учун палаталар, оналар ва болалар интенсив терапияси бўлимлари, жарроҳлик бўлими, шифохона, амбулатория ва маслаҳат диагностика бўлимлари ҳамда лабораторияларга эга бўлади.
Айни пайтда объектда қурилиш ишлари бошланган. 2022 йил якунига қадар унинг тўлиқ қуриб битказилиши кутилмоқда.
Аввалроқ Қорақалпоғистон туғруқхоналарига ЮНИСЕФ ва UNFPA томонидан 1 миллион долларлик тиббий асбоб-ускуналар совға қилингани ҳақида хабар берилган эди.
