Бугун,

  • USD 11095.31
  • RUB 173.84
  • EUR 10772.44

«Ўзбекфильм» раҳбари Фотиҳ Жалолов «Ўзбеккино» раҳбари Фирдавс Абдухолиқов устидан 109 киши томонидан ёзилган шикоят хатига имзо чеккани учун жамоадошлари февралдан бери ойликсиз ишлаётгани ҳақида сўзлаб берди.

«Бир ҳафта-ўн кундан бери коллективнинг кўзига қарай олмай қолдим. Бирор ишни қилинглар, дейишга ҳам тилим бормайди. Бу ерда 140 га яқин киши ишлайди. Ўтган йили бир амаллаб чидадик. Бу йил ҳам чидашяпти. Лекин уларнинг ҳар бирининг оиласи бор. Февраль ойидан бери ойлик олишмайди. ‘Ўзбекфильм’ давлат буюртмасини қиладиган жой. Фильм бўлса, пул тушади. Умумий студия харажатларидан ходимларга ойлик берилади. Бу даргоҳ ‘Ўзбеккинўнинг тизимидаги даргоҳ. Тизимга бееътибор бўлиш, ўз фарзандини ўзи кўмиши яхшиликка олиб келмайди. Шу пайтгача бунақа ҳолатни кўрмаганман. Бунинг, яъни ходимларимнинг ойлик ололмаётганининг асосий сабабчиси менман.

Раҳбар билан охирги гаплашганимизда у юзимга сиз менинг устимдан хат ёзгансиз, хатга қўл қўйгансиз, деди. Бу ишга бир йилдан ошди. Хатга 109 киши қўл қўйган. Уларни мен мажбурлаб, қўл қўйдирмаганман. Ўз хоҳишлари билан қўл қўйган. Раҳбарни ўғрига чиқармаганмиз хатда. Шу ходимларни сал эътиборга олайлик, деган мақсадда хат ёзилган. Хўп, мен хат ёзганман, қўл қўйганман, шунинг учун ходимларга ойлик берилмаяптими, десам, уни ўзингиз ўйлаб кўринг. ‘Ўзбекфильм’нинг 70 нафар ходими ҳам қўл қўйган, сиз уларни уйма-уй юриб, қўл қўйдиргансиз, бош бўлгансиз, шунинг учун ‘Ўзбекфильм’га ҳеч нарса йўқ, деди», — дейди Фотиҳ Жалолов.

Шунингдек, Фотиҳ Жалолов ушбу вазиятга ечим сифатида ишдан кетишни режалаштираётгани ҳақида ҳам гапирди.

«Нима учун мени деб бутун ‘Ўзбекфильм’ қора кунларни бошдан кечириши керак? Битта мен эканман, бу ердан кетганим яхшимасми, деган фикр келди. Бугун аризамни ёздим. Битта мен учун бутун бошли ‘Ўзбекфильм’ азият чекиши керак эмас. Актёрлигим бор, режиссёрлигим бор, жуда бўлмаса, фермер хўжалигим бор. Агар мен кетсам, шу ерда иш яхшиланиб кетса, мен фақат хурсанд бўламан», — дейди сўзларини давом эттириб Фотиҳ Жалолов.

Маълумот учун, 2020 йилнинг апрель ойида Ўзбекистон кинематография соҳаси арбоблари, мутахассислари, режиссёрлар ва актёрлар «Ўзбеккино» директори Фирдавс Абдухолиқов устидан бош вазир Абдулла Ариповга шикоят қилган эди.

Изоҳ
Асосий янгиликлар
Маҳаллий
“Тез ёрдам машинаси 5 йилда икки бараварга кўпайди, битта чақирув дориси 640 сўмдан 7,5 минг сўмга ошди”. “Дарё” тиббиётдаги ўзгаришларни Наманган вилояти мисолида...
Спорт
Бундеслига. “Боруссия Д” ўз майдонида рақибини тор-мор этди 
Шоу-бизнес
Instagram: Аэропортда дабдаба билан кутиб олинган Liil Хуррамов, қўшиқ куйлаган Абдуҳошим Исмоилов, янги раққосаларни кашф этаётган Юлдуз Усмонова