Уэльс шаҳзодаси Чарльз тахтга ўтирганидан кейин жамоатчилик учун расмий ва хусусий қироллик қароргоҳларига кириш имкониятини кенгайтириш ниятида, деб ёзмоқда Daily Mail.
Хабар берилишича, Шаҳзода Чарльз жамоатчиликнинг саройларга кириш имкониятини қироллик оиласи билан маслаҳатлашиб, одамларнинг йил давомида ташриф буюриши учун Букингем саройи, Виндзор қалъаси, Сандрингем саройи, Балморал қалъаси ва Кларенс-хаусни очишни режалаштирмоқда.
Шаҳзода Чарльз очишни режалаштираётган саройлар қисман ташриф буюрувчиларни қабул қилади. Қиролича ўзининг Шотландиядаги ёзги Балморал қароргоҳида бўлган пайти Букингем саройи ва Виндзор қалъаси июль ойидан октябрь ойигача жамоат учун очиқ бўлади. Балморал қалъасида эса апрель ойидан июль ойигача чекланган ташрифлар учун рухсат берилади. Англия тахтининг меросхўри ташрифлар сонининг кўпайишини ва саройлар йил давомида очиқ бўлишини хоҳлайди.
Чарльзнинг режасига кўра, ҳатто монархлар у ерда бўлишига қарамай, Букингем ва Сандрингем саройлари, ўзининг Кларенс-хаус расмий қароргоҳи, Виндзор ва Балморал қалъалари ташриф буюрувчилар учун йил давомида очиқ бўлади.
Бундай янгиликларнинг асосий мақсади сайёҳлар оқимининг ортишидан олинадиган фойдани кўпайтириш орқали қироллик саройларининг харажатларини камайтириш ҳисобланади. 2020 йилда қироллик мулкининг харажатлари англиялик солиқ тўловчиларга 38,3 миллион фунт стерлингга тушган эди.
Изоҳ (0)