Вазирлар Маҳкамасининг 6 майдаги «Ўзбекистон Республикаси сайловчиларининг Ягона электрон рўйхатини шакллантириш ва юритиш тартиби тўғрисидаги низомга ўзгартириш ва қўшимчалар киритиш ҳақида»ги 286-сон қарори қабул қилинди, деб хабар беради Норма.
Сайлов кодексига, шунингдек, Президентнинг «Сайлов жараёнига замонавий ахборот-коммуникация технологияларини жорий этиш чора-тадбирлари тўғрисида» 2018 йил 4 октябрдаги ПҚ-3961-сон қарорига мувофиқ Ўзбекистон сайловчиларининг Ягона электрон рўйхатини шакллантириш ва юритиш тартиби тўғрисидаги низомга ўзгартириш ва қўшимчалар киритилади.
Хусусан, 2-банд қуйидаги кичик банд билан тўлдирилган:
Ўзбекистон фуқаросининг паспорти (агар сайловчи фуқаро чет давлатда бўлса, хорижга чиқиш паспорти ёки дипломатик паспорти) ёки идентификация ID картаси серияси ва рақами, жисмоний шахснинг шахсий идентификация рақами, фамилияси, исми, отасининг исми (давлат тилида, лотин ёзувида), туғилган санаси, доимий ёки вақтинча истиқомат қилаётган фуқароларнинг яшаш жойи манзили ва унинг кадастр рақами Вазирлар Маҳкамаси ҳузуридаги Давлат персоналлаштириш маркази томонидан тақдим этиладиган ахборотлар ҳисобланади.
Бундан ташқари, 4 «д»-бандда аниқлаштирилишича, Ташқи ишлар вазирлиги чет давлатлардаги дипломатик ва бошқа ваколатхоналари ҳузурида тузилган участка сайлов комиссиялари томонидан сайловчилар рўйхатига киритилган ўша давлат ҳудудида турган Ўзбекистон фуқаролари тўғрисида ахборотларни тақдим этади.
9-банд қуйидаги кичик бандлар билан тўлдирилди:
- Давлат солиқ қўмитаси ҳузуридаги Кадастр агентлиги — фуқароларнинг кўчмас мулк объектлари кадастр рақамлари, улар жойлашган манзили ва геолокация тўғрисида ахборотларни тақдим этади;
- Фавқулодда вазиятлар вазирлиги, Давлат божхона қўмитаси, Миллий гвардия олий ҳарбий таълим муассасаларида таълим олаётган фуқаролар тўғрисида — сайлов бошланишидан уч ой аввал, муддатли ҳарбий хизматни ўтаётган фуқаролар тўғрисида эса сайлов бошланишидан 4 ой аввал ахборотларни тақдим этади.
Ҳужжат билан бошқа ўзгартиришлар ва қўшимчалар назарда тутилган. Ҳужжат қонун ҳужжатлари маълумотлари миллий базасида эълон қилинган ва 2021 йил 7 майдан кучга кирган.
Мавзуга доир:
Қонундаги бандлардан бири билан Президент, Қонунчилик палатаси, Қорақалпоғистон Жўрқорғи Кенгеси, шунингдек, вилоятлар, туманлар ва шаҳарлар давлат ҳокимияти вакиллик органлари учун ўтказиладиган сайловлар санаси декабрь ойининг учинчи ўн кунлигининг биринчи якшанбасидан октябрь ойининг учинчи ўн кунлигининг биринчи якшанбасига кўчирилди (2021 йилда ушбу сана 24 октябрга тўғри келмоқда).
Президент Шавкат Мирзиёев 29 декабрь куни Олий Мажлисга йўллаган Мурожаатномасида 2021 йилда ўтказиладиган «давлат ва халқ ҳаётидаги муҳим сиёсий ҳодиса» — президентлик сайловлари масаласига тўхталиб ўтганди. Ўшанда Шавкат Мирзиёев Марказий сайлов комиссияси «бўлажак сайловларнинг миллий қонунчилик ва умумэътироф этилган халқаро демократик тамойиллар асосида юксак савияда ташкил этилишига алоҳида эътибор қаратиши» лозимлигини таъкидлаганди.
Изоҳ (0)