Самарқанд шаҳар ҳудудида инфекцияни юқтириб олиш кўрсаткичи бир неча баробар ошиб бораётгани сабабли таълим муассасаларида 14 кунлик янги карантин даври жорий этилди. Бу ҳақда шаҳар ҳокимлиги матбуот хизмати раҳбари Абдужаббор Пўлатов маълум қилди.

«Самарқанд шаҳар ҳудудида инфекцияни юқтириб олиш кўрсаткичи бир неча баробар ошиб бораётгани ва унинг тарқалишининг олдини олиш мақсадида комиссиянинг навбатдаги қарори тасдиқланди. Унга кўра, 14 кунлик янги карантин даври жорий этилди, яъни 10 майдан 25 майга қадар шаҳардаги мактабгача таълим муассасалари, умумтаълим мактаблари, академик лицей ва касб-ҳунар коллежлари ҳамда олий ўқув юртларида дарс жараёнлари онлайн шаклда давом этади.

Самарқанд шаҳри фуқаролари ва меҳмонларидан карантин талабларига риоя этишларини сўраб қоламиз», — дейилади баёнотда.

Эслатиб ўтамиз, Самарқанд шаҳар ҳокимлиги ҳузуридаги Эпидемияга қарши курашиш фавқулодда комиссиясининг қарори асосида шаҳардаги барча таълим муассасалари 27 апрелдан 10 май кунига қадар карантинга олинган ва таълим бериш тизими онлайн шаклга ўтказилган эди.

Соғлиқни сақлаш вазирлиги маълумотига кўра, 10 май куни Самарқанд вилоятида ҳудудида яна 29 кишида коронавирус тасдиқланган.