Айрим касалликлар кўздаги ўзгариш ва кўриш қобилиятининг ёмонлашиши билан намоён бўлиши мумкинлиги сабаб ҳам йилда бир марта офталмолог шифокорга бориш керак.
Саратон
Бош мия саратонини дастлабки босқичда аниқлаш учун кўзларни мунтазам равишда текшириб туриш ва ўзгаришларга бефарқ бўлмаслик керак. Кўз пардасига қон қуйилиши лейкемиядан, рангдор пардадаги ўзгаришлар эса нафақат тери, балки кўзга ҳам зарар етказиши мумкин бўлган меланомадан дарак бериши мумкин. Айнан шу сабаб ҳам офталмолог шифокор кўригидан бир йилда камида бир марта ўтиш тавсия қилинади.
Қандли диабет
Кўзга бироз қон қуйилиши иккинчи турдаги қандли диабетнинг энг дастлабки босқичидаги симптомларидан бири саналади. Аксарият ҳолларда ушбу белги доимий равишда чанқаш, ҳолсизлик ва чарчашдан аввал кузатилади. Мазкур аломатларга вақтида эътибор қаратилса, турмуш тарзи ва рационни ўзгартириб, касаллик ривожланишининг олдини олса бўлади.
Гипертония ва юрак касалликлари
АҚШ ва Европалик мутахассислар ўтказган тадқиқотларда кўздаги майда қон томирларнинг торайиши билан юрак касалликлари ўртасида боғлиқлик борлиги аниқланган. Қолаверса, айнан мазкур симптомлар гипертония ривожланаётганидан далолат бериши мумкин.
Паришонхотир склероз
Кўриш нервларининг яллиғланиши паришонхотир склероздан азият чекаётган 75 фоиз беморда кузатилади. Аммо ўзбошимчалик билан ташхис қўймаслик, невролог шифокорга мурожаат қилиш керак.
Ревматоид артрит
Қуруқ кўзлар синдроми ревматоид артрит касаллигига хос энг кўп тарқалган офталмологик симптом саналади. Маълум бўлишича, ревматоид артритдан азият чекадиган ҳар тўртинчи беморда кўриш қобилияти билан боғлиқ муаммо кузатилади. Гап шундаки, артрит билан касалланган бемор организмидаги яллиғланиш билан боғлиқ кимёвий моддалар эртами, кечми кўз олмасига ҳам зарар етказади.
Изоҳ (0)